Dang thawlad ka Sorkar Jylla ban weng ïa ka jingeh ki paidbah na ka jinghap pynlip bording

Shillong, Jymmang 2 : U Myntri Rangbah ka jylla u Conrad K Sangma mynta ka sngi Ba Ar u la pynpaw ba ka jingeh na ka jinghap ban pynlip bording ka dei da shisha ka jingeh kaba khraw tam ba ki paidbah ki ïa kynduh na kane ka tnad pynmih bording ka jylla hynrei u la kular ba ka sorkar ka dang thaw ki lad ki lynti kumno ban pynduna noh ïa kane ka jingïakynduh ki paidbah na ka jinghap pynlip bording.
“ Ngi kyntu ïa ki paidbah ban ïai shah lem bad ngi shipor halor kane ka jingeh kaba ngi ïakynduh mynta. Ngi sngewthuh ba ka long da shisha ka jingïakynduh kaba sngwesih ïa ki paidbah hynrei ha kajuh ka bor ka dei ruh ka por kaba ka sorkar ruh ka mad ïa kajuh ka jingeh. Ngi dang wad ki lad ki lynti kumno ban pynduna katba lah ïa ki kynta pynlip bording bad kumjuh ruh ban pynlip ruh da ka por na kawei ka jaka sha kawei pat tangba kane ruh ka shong ha ka jinglong jongka mariang” ong u Myntri Rangbah.
“ Kane ka dei ka por kaba eh tam ïa ka tnad pynmih bording hynrei katba ngi dang ïaid shakhmat ngin pyrshang ban ïaleh katba lah ba kan ym jia shuh kumne kumba jia mynta u bnai bad ngin pyrshang ruh ban dang pynbha bad pynkhlaiñ ïa ka rukom pynmih bording ha ka jylla. Tang kawei kaba lah ban pyllait kloi ïa kane ka jingeh ha kane ka kynti ka dei tang lada wan ka jingjur slap ha ka jylla bad kumjuh ruh ba ka sorkar kan lah ban ïoh thied bor ding ha ka dor kaba kham tad” ong biang u myntri rangbah.
U la ong kumba long mynta ka dor ka rem bha namar ka jingkyrduh bording kam dei tang ha Meghalaya hynrei ha ka thaiñ bad ka ri hi baroh kawei namar ka jingduna pynpoi bording ki Grid ne ki tnad pynmih bording.
Hooid ngin hap ban ïaid bad kine ki jingeh shipor arpor hynrei nga kyrmen skhem ba ngin sa lah hi ban pynduna ïa ki kynta suki pa suki khamtam mynta ba la poi ka por lyiur, ong biang u myntri rangbah.
U la ïathuh, kumba long mynta ka MeECL ruh ka don hapdeng ka jingkyrduh pisa bad ka donkam ïaka jingiarap ka sorkar ha kiba bun ki liang.
“Ngi hap ban ai ka jingkyrshan bha ïa ka MeECL bad na kata ka daw sa lah ban long kumne kumba long mynta ruh tangba kine ki jingeh hapoh ka MeECL ki la khia bad jur palat kumta ka don ka jingpyrshang ban wanrah ka jingpynkylla ha ka MeECL bad kyrmen hapoh une u snem yn sa ïohi bun ki jingkylla” ïathuh u Conrad.
U la ïathuh ka daw ba hap ban pynlip bording bun kynta ruh ka dei namar ba une u snem u dei u snem election kumta ym lah ban pynlip tang ar haduh lai kynta kumba ju long man la u snem naduh u Kyllalyngkot haduh u Jymmang.