Kyntait ka UDP Pynursla ba don ka jingmih ki dkhot na ka daw ba kyrshan MDA ka party

0

Shillong, Jymmang 02: Ka UDP Pynursla Circle ka la kyntait ïa ka jingmih ha ki lad pathai khubor ba ka don ka jingpait jingpra ka party ha Lapalang Unit kaba hap hapoh Pynursla Circle na ka daw ka jingpyrshah jong ki dkhot halor ka rai ka UDP ban don lang ha ka sorkar MDA.
Ha ka kyrwoh sha ki lad pathai khubor u President ka UDP Pynursla u Bah Aihok Khongmalai u la ong ba kane ka jingmih ha ki lad pathai khubor ka dei kaba bakla namar kumba long mynta ka Unit jong ka UDP ha katei ka shnong ka dang don bad ka jingmih khubor ka long kaba bakla.
“U ba kam ïalde ba u mih noh na ka party ruh u dei uba dang shu wan pynïasoh dang ha ki khyndiat bnai shuwa ka elekshon bad ngim phylla eiei ïa ka jingmih jong ki na ka party namar ki wan sha ka party na bynta ka jingmyntoi shimet bad ynda kim i ïoh jingmyntoi kin mih ban leit wad party thymmai ban pynïasoh hynrei ka Unti jong ka UDP ka dang don,” ong u Bah Aihok Khongmalai.
“Hadien ba ngi ïohi ba ka don ka khubor kaba kum katei ngi la lum ïa ka jingïalang jong ka Circle ban wad ïa ka jingshisha bad ha kane ka jingïalang u Vice President ka Lapalang Unit u la pynshai bad kam don ka jingpait jingpra kumba la kam,” u la bynrap.
Haba ïadei bad ka rai ka UDP ban ïasnoh ha ka sorkar ba ïalam ka NPP hadien ka elekshon, “Ngim don eiei ban tuklar ïa ka rai ka party namar kane kam dei hapoh ka jingpeit ka circle hynrei ha ka state level,” ong ka kyrwoh.

Leave A Reply

Your email address will not be published.