Ha ka India’s Talent Fight ïoh leit pyni ka samla Twinklely ïa ka sap rwai

Shillong, Jymmang 02: Ka samla Twinklely Grace Ïawrod kaba na ka shnong Phlangwanbroi kaba hap hapoh ka Mawsynram Constituency ka la shah jied ban ïakhun ha ka rynsan ïakob pynïasap kaba heh kaba la tip kum ka India’s Talent Fight Season-3 kaban sa long ha ka 31 tarik u bnai Jymmang 2023 ha nongbah Delhi.
Haba kren sha ki lad pathai khubor ha ka sngi Ba-ar, ka samla Twinkle ka la ong ba ka don ïa ka sap ban rwai hynrei namar ba ka wan na ka longïing ka longsem kaba jynjar ha ka liang ka ïoh ka kot ka long kaba eh ïa ka ba kan mih shakhmat ban khamtam ban leit shim bynta ha ki rynsan kiba kham heh kiba pynlong shabar ka jylla.
“Haba ka don ïa ka sap ruh kan myntoi aiu lada ngim ïoh ban sei pyrthei bad na ka liang jong nga ka dieng pynkiang ban sei pyrthei ïa ka sap kaba nga don ka dei namar nga wan na ka ïing kaba duk kaba ym don pisa ban bei na bynta ka jinglut jingsep ha kane ka jingleit shim bynta,” ka la ong.
Na ka liang ka samla Twinklely bad ka ïing ka sem ki kyrpad ïa ki paidbah ban noh synñiang lem na bynta ka bailut baisep, “Ngi la leit mih sha ki MLA bad MDC ban ïarap bei tyngka hynrei ka jingkyrpad jong ngi imat kam seisoh satia bad ngi la leit ruh sha ki katto katne ki kynhun hynrei kane ruh kam seisoh bad dei tang da ka jingïarap i Bah Kitbok Thabah u ba dei u President ka All Meghalaya Dancer’s Association ba nga la nud ban shim ïa ka rai ban leit sha khmat ban shim bynta ha kane ka rynsan pyi sap,” ong u hymmen jong ka Twinklely.
“Nga kyrpad ïa ka sorkar ba kan sngap ïa ka jingdawa ka AMDA ban ïarap ïa ki riew donsap bad ba la katno sien nga la hylla, la kren bad nga la ïeng hakhmat Secretariat ruh hynrei ka sorkar kam don ïa ki shkor na ka bynta ki khynnah samla, ban ïarap ban kyntiew ïa ka sap ki samla da kaba ka ai jingïarap da ka pisa,” ong u Bah Kitbok Thabah.