Shillong, Jymmang, 02: Ki bahaing hasem jong ka Kong Altima Rani, ka longkmie kaba leit ban kha ïa i khunlung ha Ganesh Das Government Maternal and Child Heatlh Hospital, Shillong ki la pynpaw ïa ka jingsih shikatdei eh ïa ki bor pynïaid jong kane ka Hospital hadien ba kane ka longkmie ka la mad ïa ka jingsuh jingthar ha ka met ka jong ka, na ka daw ka jingkdiah jong u thyrnia uba la sahkut hapoh ka met uba ki doktor ki la pyndonkam ban suh ïa ki bynta jong ka met jong kane ka longkmie hadien ka la kha hi ïa i khunlung.
Katkum ka jingïathuh jong u Kñi jong ka Kong Altima Rani u Bah Shining Rani ha ka jingïakren bad ki lad pathai khubor ha ka sngi baar, ïa kane ka longkmie kaba sah ha ka shnong Mawlyndep, la pynkit sha Umsning Community Health Centre ha ka 29 tarik u Ïaiong, 2023 bad tang ha ka 30 tarik u Ïaiong, 2023 la pynkynriah noh ïa ka sha Ganesh Das Government Maternal and Child Heatlh Hospital, Shillong kaba la kha ïa i khun ha ka 1 tarik, Jymmang, 2023.
Ban lap ïa ki jingshisha halor ka jingsahkut jong u lyngkhot thyrnia hapoh ka met, ki bor pynïaid jong ka Hospital ki la pynkit noh ïa kane ka longkmie sha NEIGRIHMS Hospital bad hadien ba ladep leh ïa ka X-ray bad ïa ka City Scan ki doktor ki la pynshisha ba u thyrnia u la sahkut hapoh ka met jong ka Kong Altima bad ba la donkam ban sei noh mardor.
Ha kaba ïadei bad kane ka jingjia, ka Additional Medical Superintendent jong ka Ganesh Das Hospital ka Dr. Merimai Syiemlieh ha ka jingïakren bad u nongthoh khubor, ka la kyntait ruh ïa ka jingkynnoh ba ki doktor ki leh torti bad ha kajuh ka por ka la pynshai ba ka jingpynkynriah ïa ka Kong Altima sha NEIGRIHMS Hospital ka long ban sei ïa u thyrnia namarba ha Ganesh Das Hospital kam don satia ïa ki tiar kiba biang kiba lah ban sei ïa une u thyrnia.
Ka Dr. Syiemlieh ka la pynshai kane ka jingsahkut jong u thyrnia ka dei kaba shu jia ryngkhat la katta snem ba ha kane ka Hospital la pynkha ïa ki khunlung.
Ka la ïathuh ruh ba ïa i khunlung ba dang shu kha jong ka Kong Altima Rani la pynkit noh sha Nazareth Hospital, Shillong ban ïoh ïa ka jingsumar kaba kham bha.
