Hadien ar snem yn ïohlad ki riewngeit Catholic ban ïashim bynta ha ka Proseshon Eucharist

Shillong, Naiwieng, 10: Hadien ar snem ka jingpynthud jong ka khlam jingpang Covid, mynta ka kynti, ki paid riewngeit jong ka Balang Catholic ka Shillong Archdiocese kin sa ïoh lad ban ïashim bynta ha ka Procession Eucharist kaba ju long ha Laitumkhrah.
U General Secretary jong ka Parish Pastoral Council (PPC) ka Laitumkhrah Parish u Bah Barnabas Nongbah ha ka jingïakren bad ki lad pathai khubor ha ka Sngi Palei u la ong kumba ju long ka rukom ïa ka proseshon la ju pynlong ha ka taiew baar jong u bnai Naiwieng.
“Yn sa sdang ïa kane ka sngi da ka Mass Bakhuid ha ka por 10:00 baje mynstep ha madan Kalbari ha kaba u Archbishop jong ka Jyllaniam Bah Shillong u Most Rev. Victor Lyngdoh un sa long u kongsan ha ka Mass Bakhuid bad ka proseshon Eucharist kan sa long ha ka por 1:30 baje nohphai sngi,” la ong u Bah Barnabas.
Ha kaba ïadei bad ka jaka pynieng ïa ki kali jong ki parabangeit bad ki jingbthah ba dei ban bud, u la kyrpad sha baroh ki parabangeit ki ban wan ha katei ka sngi ba kin bud katkum ki jingbthah khnang ba ka jinglehniam kan long kaba ïaid beit ïaid ryntih.
U la ïathuh ba ka proeshon Eucharist ka ban long mynta u snem la antad ba ki paidriewngeit ki poi la kumno kumno 80 hajar haduh 1 lak ngut eiei kata na ki Parish jong ka Jyllaniam Bah Shillong, Jyllaniam Nongstoiñ bad Jowai.
Lah ban kdew hangne ba ka jingwan ka jingpang khlam COVID 19 ha u 2020 bad 2021 ka la ktah jur ïa ka rukom pynlong ïa ki jingshakri Blei ha kylleng ka pyrthei kynthip hangne ha jylla Meghalaya, ha kaba ki Balang Khristan ki ju don ki jingshakri Blei kiba don bun ki riewngeit.
Ka Balang Catholic ruh ka la hap ban sangeh ha kine ki ar snem ïa ka Procession Eucharist kaba la ju pynlong man la ka snem, namar ba kadei ka Procession kaba wan poi da ki phew hajar bad lak ngut ki riewngeit. Hynrei mynta ka snem ba kane ka jingpang ka don shuh ne ka la duna, la rai ban pynlong noh kumba ju long ha ki snem shuwa ka COVID 19.