Byrngem khang tala ka HYC ïa ka Secretariat lada ym pyllait ka Sorkar ïa ka Scholarship

Shillong, Naiwieng, 10: Ka Hynniewtrep Youths Council (HYC) ka la byrngem ban khang tala ïa ka ophis Main Secretariat lada ka Sorkar Jylla kam pyllait ïa ka baibam lane ka Scholarship jong ki samla pule hapoh shitaiew.
Kum ban shu pyntip hangne ba ka Sorkar Jylla ka la pynbna ba ka la pyllait ïa ka song pisa kaba 169 klur tam ha ka Sngi Balang ban siew noh ïa ka Pre-Matric bad ka Post Matric Scholarship sha ki samla pule jong ka jylla Meghalaya hadien ba kane ka kynhun bad ki samla pule ki la byrngem ban pynlong da ka jingïakhih mynta ka sngi Palei.
Ki samla pule ryngkat bad ki nongïalam ka HYC kiba la ïalum lang hakhmat ka Shillong Law College, ha Malki ki la byrngem ban pynlong beit da ka jingïakhih lada ka Sorkar Jylla kam bat ïa ka kular kumba ladep pynbna da u Myntri ka tnat Pule Puthi u Bah Lahkmen Rymbui.
U Secretary ka Education Cell ka HYC u Samla Enlang Sawian haba kren ha ka jingïalang bad ki samla pule u la ong, “ngin ai por tang shi taiew ïa ka Sorkar ba kan siew noh ïa ka Scholarship hynrei lym kumta ngin leit khang tala noh ïa ka Secretariat.”
U General Secretary ka HYC u Bah Roy Kupar Synrem uba la synran lang ïa ki samla pule ha kane ka sngi u la kynthoh ïa ka jingpynslem jong ka Sorkar Jylla ban siew ïa ka Scholarship jong ki samla pule bad ïa ka tulop jong ki nonghikai skul katba ka Sorkar ka kloi ban pynsyrwa ïa ka pisa da ki klur tyngka tang ban pynlong ïa ki tamasa ki bym ai jingmyntoi ïa ki paidbah.
Hadien ba la mih na Malki, ki nongïalam bad ki dkhot jong ka Hynñiewtrep Youths Council (HYC) ha ka Sngi Palei ki la pynkheiñ ïa ka Section 144 CrPC ba la pynjari da ki bor synshar ka East Khasi Hills District ha nongbah Shillong baroh kawei da kaba ïalum paidbah hakhmat u durmot jong u Kiang Nangbah uba don hajan ka Shillong Civil Hospital, ban pynrem jur ïa ka Sorkar Meghalaya Democratic Alliance (MDA) halor ka jingshah leh tohmet jong ki dkhot ka seng ha ki Pulit ha ka shnong Rambrai ha ka Sngi Balang.
Nangne, ki dkhot ka HYC ki la pynlong pat sa ka jingïaid proseshon da kaba pyrta shla ïa ki sur pynrem ïa ka Sorkar Jylla. Ki Pulit bad ki Magistrate kiba la wan poi biang por ki la ïoh ban khanglad ïa ki dkhot ka HYC hashwa ban poi ha All Saints’.
Kum ban shu pynkynmaw, ki dkhot jong ka HYC ka West Khasi Hills District ki la shah pakhang lynti ha ki bor Pulit katba ki dang thmu ban pynthud ïa ka jingleit iuhkjat jong u Myntri Rangbah ka Jylla u Conrad Kongkal Sangma ha ka shnong Rambrai, West Khasi Hills Disrict na ka bynta ban buh ïa u mawnongrim ha ka jingpynbna ïa ka Community and Rural Development Block ba thymmai ïa ka Rambrai.
Katba ki dkhot ka HYC ki dang ieng harud surok ban pyrta ïa ka sur pynrem pyrshah ïa u Myntri Rangbah ki Pulit kiba la ap pahara ki la knieh ïa ki lama bad ïa ki plakad na ki dkhot jong ka seng kat haduh ba shipor ka la mih ka jingïapyni bor mar kylliang.
Kane ka jingïakhih jong ka HYC ka long shi bynta na ka jingdawa ïa ka Sorkar ban pyntreikam ïa ki khyndai tylli ki mat jingdawa hapoh ka Save Hynñiewtrep Mission.