Shillong, Naiwieng 10 : U Myntri ka sorkar pdeng uba dei peit ïa ka Road, Transport bad Highways u Nitin Gadkari ha ka jinggïalang ba la long ha nongbah Guwahati ha ka Sngi Balang u la bthah ïa ki bor ba dei peit ba ki dei ban pyndep noh kloi ban shna pynbha ïa ki surok bah kiba don ha Assam, Meghalaya Sikkim bad Nagaland.
U Myntri u la wan sha ka nongbah Guwahati ban bishar bniah ïa ka jingïaid shakhmat ka jingpyntrei ïaki surok bah (National Highway Project ha kane ka thaiñ shatei lam mihngi ka ri India.
\ Ha katei ka jingïalang na ka jylla Meghalaya la leit ban ïashim bynta da u Symbud Myntri Rangbah bah Prestone Tynsong.
Ha ka jingïalang la ïakren halor kiba bun ki mat khamtam ha kaba ïadei bad ka jingsiew pisa ban ïoh ïaki jaka puta ban shna ïa ki surok bah. La ïakren ruh kumno ban pyntrei da ki kor ki bor bad ki buit thymmai jong kane ka juk ba mynta bad dei ban ïa pynbeit noh bad siew dep noh ïa ka bai jaka puta khnang ban sted ka jingpyntrei ïa ki projek.
U Myntri u la tohkit ruh ïa ka daw ba slem ban pyndep ïa ki surok ha ki saw tylli ki jylla khnang ba un sngewthuh kumno ban leh. U la bthah ïaki bor ba dei peit ba ki dei ban pyntrei sted ïa ki project khnang ban pyndep ha ka por ba la buh. U la ong ba dei ban don ka jingïatrei kaba jan hapdeng ki tnad sorkar pdeng bad sorkar jylla khnang ban sted ka jingpyntreikam ïa ki surok bah ha kane ka thaiñ.
U Gadkari u la ong ruh ba ka thong jongka sorkar ka long ban pyntrei 60 Km ki surok bah ha ka shisngi. “ Hynrei ngi lah ban pyntrei tang 40 Km ha ka shisngi, wat la katta ruh ngi dei ban poi beit sha ka thong ban pyndep 60 Km ha ka shisngi”. Ong u Myntri.
Ha u snem 2021-22 ka jingpyntrei ïaki surok bah ka la kot sha ka 37 Km ha ka shisngi hynrei na ka daw ka khlam COVID ka la suki bad hiar sha ka 28.64 Km ha ka sngi sngi.
Ka National Highways Authority of India (NHAI) and National Highways bad ka Infrastructure Development Corporation Ltd (NHIDCL) ki dei kiba peit ïa ka jingpyntrei ïaki surok bah ha India.
Ki bor ba dei peit ki buh thong ba dei ban pyndep haduh 12,000 Km ka surok mynta u snem. Ha u snem 2019-20 la lah ban pyndep 10,237 Km ka surok bad ha u 2020-21 la lah ban pyndep haduh 13,327 Km bad ha u 2021-22 kat haduh mynta dang lah ban pyndep tang 10,457 Km.
