Shillong, Naiwieng, 10: Ar ngut ki briew kiba la shah rahbor ha ka kynhun ki runar nonglute ki la lait im da ka jingïarap jong ki Pulit ka rilum Garo ha ka Sngi Palei.
Kum ban shu pyntip hangne, ki Pulit jong ka West Garo Hills District ki la pynlong ïa ka jingbuddien ïa kane ka jingjia hadien ba la register case ha Tikrikilla Police Station hapoh ka Section 364A/506 jong ka Indian Penal Code (IPC) hadien ba uwei u briew uba la tip kyrteng kum u Bikas Chetia na Guwahati, Assam uba dei nongniah taksi u la shah rahbor ha ka 4 tarik mynta u bnai na ka shnong Tikrikilla.
Hadien kane ka jingjia, ha ka 9 tarik mynta u bnai ki Pulit ka Goalpara ki la pyntip ba uwei u khynnah u la shah rahbor ha ki runar sha West Garo Hills District. Halor kane ka jingjia, ki Pulit ka Lakhipur Police Station ki la register case hapoh ka Section 365/387/34 jong ka Indian Penal Code (IPC) bad ki Pulit kiba la pynlong ïa ka jingtohkit kaba bniah, ki la lap ksai ba ïa kine ki arngut ki briew la rahbor da kajuh ka kynhun runar kaba ïakhleh lang da ki runar na ka jylla Meghalaya bad na ka Jylla Assam.
Da kane ka jinglap ksai ba ïa kine ki arngut ki lanot ki runar la pynsah ha khlaw Dibru Hills Forest Reserve kaba don hajan ka Bamandanga ha Gaptuli ki Pulit ki la pynlong ïa ka jingkhynra ha ka Sngi Balang.
Kane ka kynhun runar tang shu ïohi ïa ki Pulit ka la synreit kuli naphang bad ki Pulit ruh ki la pynphai kylla ban ïada ïalade. Shipor ka la mih ka jingïather kuli kaba mar kylliang kaba la neh haduh 3 minit eiei.
Hadien ba la sangeh ka jingïather kuli, ki Pulit ki la ïoh ban khang kdong ïa kane ka jaka ha kaba ki la lap ar tylli ki metïap kiba la thiah lyngktar ryngkat bad ki tiar siat bad ïoh pyllait im ïa ki arngut ki lanot kiba la shah rahbor.
Na kane ka jaka ki pulit ki la ïoh kurup kawei ka suloi AK, kawei ka pistol, kawei ka pla ba la thep 23 tylli ki kuli jong ka suloi 7.62 mmm, bad 9 tylli ki kuli jong ka pistol 9 mm bad kiwei kiwei de ki tiar.
