Shillong, Naitung, 19: Ki nongtrei Casual bad Contractual ka Meghalaya Energy Corporation Limited (MeECL) kiba don hapoh ka shatri jong ka MeECL Progressive Workers Union (MPWU) ha ka sngi Thohdieng ki la aiti sha u Chairman-cum-Managing Director ka ka MeECL, ïa ka kopi jong ka hukum ka Iingbishar Meghalaya High Court hadien ka jingïakhun mukotduma ha u snem 2016.
U President ka Union u Bah Mantiphrang Kiri Lyngdoh ha ka jingïakren bad ki lad pathai khubor u la ong ba kan long ka sngi ka ban sah jingkynmaw namarba ka Ingbishar ka la pynksan ïa ki nongtrei Casual jong ka MeECL ba ki dei ban ïoh ïa ka jingsiew ïa ka juh ka Basic Salary Structure kaba la siew sha ki nongtrei bapura.
“Ka hukum jong ka MeECL ka kdew ruh ba dei ban pyntreikam noh hapoh ar bnai naduh ba la ïoh pdiang ïa ka kopi jong ka hukum,” la ong u Bah Lyngdoh.
Shuh shuh u la ong ba kane ka jingjop ïa ka jingïaleh mukotduma kaba jrong haduh 7 snem tam da ka MeECL Progressive Workers Union ka dei ka jingjop jong ki nongtrei Casual kiba la trei bun bun snem ha kaba ïa ki jingmyntoi kum ka Casual Leave, Earned Leave, Rolling Contracts, Arrears, EPF, jingpynkiew tulop ka la urlong.
U la ïathuh ruh ba naduh ba la thaw ïa ka Union ha u snem 2017 ka la rai ban ïakhun ïa ka hok ka jong ki kum ki nongbylla jong ka MeECL ïa kaba ym shym la pynthymmai satia.
Kane ka jingjop kan ai jingkyrmen ruh ïa kiwei ki nongtrei bylla ha Meghalaya ba kin ïoh ïa ka hok ka jong ki, la ong u Bah Mantiphrang Kiri.
