Nongpoh, Nailar, 20: Uwei u rangbah uba la tip kyrteng kum u Rajesh Jana, 38 snem na ka shnong Umroi Nongrah Dongrudwah, Ri-Bhoi ha ka Lah Sngi u Blei u la pynkut noh ïa la ka jingim ha u tyllai phasi ha kawei ka sem syiar kaba don hajan ïingsah jong u.
Ka khubor ba la ïohlum ka ïathuh ba kane ka jingjia la lap ruh da ka kmie bad ki para ha ka por mynstep ha ka por kumba 7:45 baje.
Ki Pulit ka Khapmara PIC tang shu ïoh jingtip, ki la leit mar mar ban pynlong ïa ka jingtohkit hynrei ki bahaïing ki la pynhiar ïa ka met shuwa ban poi ki Pulit bad la pynthiah ha jingthiah.
La ïoh jingtip ruh ba une u rangbah u dei uba dang don hapdeng ka jingshah sumar ha MIMHANS Hospital, bad u la thmu ruh ban pynïap ïalade ha ki por ba mynshuwa, hynrei dei ha kane ka step ba u la pynkut syndon ïa la ka jingim da kaba sdien phasi hadien ba la dep dih sha step bad don ruh ka dak tyllai ha ka liang kamon ka ryndang.
Halor kane ka jingjia, ki bahaïing ki la kyrpad ban pyllait na ka jingleh ïa ka Post Mortem hadien ba ki la tip shai ba u la phasi hi ïalade bad na ka liang u Majistor u la pdiang ïa ka jingkyrpad bad aiti noh ïa ka met sha ki bahaïing hasem ban pyndep ka jinglehñiam ba khatduh hadien ba ki Pulit ki la pyndep ïa ka kamram katkum ki kyndon jong ka aiñ.
