Shillong, Nailar 20: U nongïalam ka United Democratic Party (UDP) bad u Myntri barim ka tnat ki Kam Pohïing ka sorkar jylla u Bah Lahkmen Rymbui ha ka sngi baar u la ong ba ym don ba lah ban khang ïa ka party jong u ban pynrem ïa ka sorkar Meghalaya Democratic Alliance (MDA) halor ki kam kiba ktah ïa ki kam pynroi jong ka jylla.
“Kane ka “coalition dharma” ka don kaba ki seng kiba ïatreilang kat kaba leh, kat kaba ngi kren kan don jingmut na ka bynta ki paralok kiba ïatreilang. Haba kren ïa kane, kam don ka jingkylli jong kano kano kaba lah ban khang ïa ngi. Lada ka don kano kano kaba ngi dei ban pynrem ïa ka sorkar, ngin leh ïa kata naba ngi don hangne ban pynkhlaiñ ïa ka synshar paidbah, ban pynkhlaiñ ïa ka sorkar ha ka jylla. Kumta kaei kaei kaba ngi ïohi kaba ktah ïa ki kam pynroi jong ka jylla ne ka jingkiew jong ka jylla, ngin ym tieng ban pynrem ïa ka sorkar watla ngi donlang hapoh ka sorkar,” ong u Rymbui haba kren sha ki lad pathai khubor haba jubab ruh ïa ka jingïoh bun paid ka seng NPP kaba la kiew sha ka 31 ngut ki MLA ha ka ïing kaba don 59 ngut ki dkhot hapoh ka ïing da kaba pynïasoh jong ki 3 ngut ki MLA ka Congress.
Ha kawei pat ka liang, u nongïalam ka UDP u la ïaroh ïa ka sorkar MDA hapoh ka jingïalam jong u Myntri Rangbah ka jylla u Conrad K Sangma kaba la wanrah ki kam pynroi ha kylleng ka jylla ha kine ki 6-7 snem ba la leit.
“Peit haba phi kren shaphang ki kam pynroi ha ka jylla Meghalaya, ka long kaba ym ban len ba ha kine ki 7 snem ba la leit jong ka sorkar ba la ïalam da u Conrad K Sangma kat shaba phai ka la don ka jingkylla ha ka jylla. Wat hapdeng ki jingïaleh ba bun, ki la don ki jingkylla la ka long ha ka Koit ka Khiah, ka pule puthi, ka rep ka riang, ka kam sam umbam umdih bad kiwei, phin shem ka sorkar ka la pynlut bun ha ki kam human resource development,” u la ong da kaba bynrap, “Kumta ki kam pynroi ha ki constituency jong ki paralok MLA kiba ïatreilang phin ïohi ki don ki jingkylla.”
“Na ka bynta jong nga, haba kren shai, kino kino ki kam pynroi kiba ka sorkar ka la leh ha kine ki 6-7 snem ba la leit ym lah ban len bad kane ka phalang hapoh ka mang tyngka naduh kaba ngi la sdang bad kaei kaba ngi long mynta,” ong u MLA ka Amlarem.
