Ha Phot Umnew – Mawpon, tam platik ki nongtrei ha ka ophis PHE Mawkyrwat Division

Mawkyrwat, ‘Nailur 30: Kum shibynta jong ka jingrakhe ïa ka ‘Swachhata Hi Seva’ kaba long ka prokram ban ïada bad pynneh pynsah ïa ki umbam umdih, ka ophis jong u Executive Engineer (EE) ka Public Health Engineering (PHE), Mawkyrwat Division, South West Khasi Hills District mynta ka sngi ka la pynlong ïa ka Cleaning Drive Water ne jingtam ïa ki plastik.
Ïa kane ka jingleit bam tam ïa ki plastik, ki la pynlong ha shi lynter jong ka Phod Umnew da kaba ki sdang na ka jaka ba don ka pom um bad haduh Phot Mawpon da kaba thmu ban wanrah ïa ka jingkhuid jingsuba namar kathaduh mynta dei tang kane kawei ka wah ba ki nongshong shnong ha kane ka thaiñ Mawkyrwat ki ju pyndonkam ban pynlong ban tang ne ring ïa ka umbam umdih.
U bah Shekborlin Shiangbai, District Co-ordinator BDBM jong ka Mawkyrwat Block haba kren ha ki lad pathai khubor u la kyntu ïa ki paidbah ba katba ka por ka dang biang ki dei ban sumar khuid kyndong ïa kane ka wah namar haduh mynta kane ka wah ka dang long kaba khuid bha haba ïa nujor bad ki wah kiba don ha ki jaka sor kum ka Wah Umkhrah. Kumta kum ki paidbah nongshong shnong ki dei ban bud ryntih ïa ki kyndon jong ki shnong ki thaw namar kumba la ïohi ha ki jingthoh ba ha kane ka Phot Umnew ïa mynta ym shah shuh ban wan saitjaiñ ne sum ryngkat ka jingpyndonkam sabon ne wat ban bret pathar ïa ki jakhlia.
Ha kane ka Cleaning Drive Water ne jingtam ïa ki plastik la wan ïashimbynta lang da ki nongtrei hapoh jong ka PHE Mawkyrwat Division.