Nongpoh, Ïaiong 07 : Ban pynneh pynsah ïa kawei na ka jingshad tynrai ka Raid Nongtung ba hap ha ka Hima Khyriem Syiemship ha Ri Bhoi District, ka Raid Nongtung hadien ba la shah khanglad na ka jingwan lynshop ka khlam COVID-19 ba kim ioh lad shuh ban pynlong ïa ka Shad tynrai ba la tip kum ka ‘Shad Lakhempong’ bad mynta u snem ka Dorbar u syiem ka Raid Nongtung ka la rai ban shim biang ïa ka sienjam ban pynlong ïa kane ka shad tynrai kaba dei kawei na ka jingshad ba paw hapoh ka Raid Nongtung ha Ri Bhoi District.
Ïa kane ka Shad Lakhempong la shim khia lang ban pynlong naduh ka Dorbar u Syiem ka Raid Nongtung, ka RBYF Raid Nongtung Circle bad kynthup ka Synjuk ki Rangbah Shniong Raid Nongtung Border area ba la rai ban pynlong ha ki ar sngi lynter kata naduh ka 21 tarik u Ïaiong 2013 haduh ka 22 tarik u Ïaiong 203 ha Madan ka Shnong Ummat.
Haba ïa kren mynta ka sngi bad U President ka Synjuk ki Rangbah Shnong Raid Nongtung Border Area, u la pynpaw da kaba ong ba ka Synjuk ryngkat ka Dorbar u Syiem ka Raid Nongtung lem bad ka seng RBYF ki angnud ban pynlong ïa kane ka tamasa Shad Lakhempong kaba phuh ba phieng bad ruh kaba long shi bynta ban pynneh pynsah ïa ki riti ki dustur ka Raid Nongtung kumba la ïalam da ki longshuwa ki manshuwa.
U la ïathuh ruh ba kane ka sien kaba mynta ba la pynlong ïa kane ka Shad Lakhempong ka dei ruh kaba kham pher ha kaba kum ki bor pynïaid ki la pyrshang ban pynkhreh pynkhrum ha ki bynta bapher bapher ban long kata ka tamasa kaba jop bad kaba ai jinghun ïa ki khun ki hajar hapoh ka Raid.
U la ong ruh ha katei ka sngi, kin don ruh ki jingpyni nam ïa ki bam tynrai, ki riam tynrai bad kiwei kiwei kiwei ki tamasa kiba dei katkum ka kolshor jong ka Raid khamtam ki jingshad tynrai, ki jingrwai tynrai bad kiwei kiwei kiba dei ki riti ki dustur ka Raid yn pyninam ha katei ka sngi.
Shuh shuh, u la bynrap ruh da kaba ong ba ki nongpynïaid kane ka tamasa Shad Lakhempong ki khot ki wer ïa baroh ki khun ki hajar hapoh ka Raid bad kumjuh ruh ïa ki paidbah hapoh ka jylla ba kin wan ban sakhi sha kane ka tamasa bad kum ki nongpynïaid ki kyrmen skhem ruh ba ka jingwan shim bynta lang kiwei kan pynlong ïa kane ka tamasa kaba jop bad khamtam ba ka Raid kan dang lah ban pynneh pynsah ïa baroh ki riti ki dustur kiba pher bapher kiba long shi bynta ruh ha kane ka shad Lakhempong, u la bynrap.
