Kyntu ka EJNC ïa u DC ka EJHD ban pynsangeh noh ïa ki trok kit dewiong ba leit sha karkhana dewbilat

Khliehriat iaiong 07 : Ka East Jaiñtia National Council Central Executive Council, ha ka 06tarik ka la leit ban buh da ka jingthoh hakhmat u Deputy Commissioner ka East Jaiñtia Hills District, ha kaba ka seng ka la kyntu ïa u ba un shim khia ban pynsangeh noh shi syndon ïa ki trok kiba kit dewïong na bar jylla kiba leit buh dewiong sha ki karkhana dewbilat kiba don hapoh ka district, la kynthoh ruh ba ka seng ka la lap ruh ba don ki trok kiba kit ïa u dewïong khlem da biang ki kot ki sla bad kane ka long kaba beaiñ.
La ong ba na ka liang, u Deputy Commissioner, u Abhilash Banarwal, IAS u la kular ba un shim khia ïa kane ha kaba un sa phah da ka jingthoh sha ki tnat ba dei peit kum sha u DMO bad sha ka tnat pulit ban pan ïa ka jingpynshai bad ban leh eiei halor kane ka jingleh beaiñ jong ki karkhana dewbilat.
Na ka liang ka seng ka la byrngem ruh ba lada ki bor district bad ki tnat ba dei peit kim shim khia ïa kane, ka seng kan mih sha khmat ban bthah ïa ki dkhot jong ki Unit bad ki Circle bapher bapher ban leh hi ïa kaei kaba donkam ka ban long na ka bynta ka bha ka miat bad ka jingiohnong jong u paidbah jongka district hi baroh kawei.
Haba kren sha ki pathai khubor, u President jong ka East Jaiñtia National Council, u bah Sambormi Lyngdoh, u la ong ba ka seng ka la ïoh ki jingujor ba ki don bun ki trok kiba wan na bar jylla kiba kit ia u dewiong sha ki karkhana dewbilat bad ka seng ka la shim khia ha kaba hynnin ka sngi ka la ïoh bat ïa kawei ka trok kaba dei jong ka Star Cement bad haba la bishar bha ïa ki kot ki sla la lap ba kam pat biang bha ki kot ki sla “kaba pynlyngngoh ïa ngi ka long ba kine kiba kit dewiong kiba wan na bar jylla kim shym la bud ïa ki SOP ne ki jingbthah (notification) ba la pynmih da ka mining and Geology ha ka 8 traik u naiwieng 2022, ha kane ka SOP ka la thoh shai ba kino kino ki mar kum u dewiong ne kino kino ki mar kiba wan na bar, ki dei ban ïoh jingbit (aproval) na ka tnat Mining and Geology bad hadien kata ki dei ruh ban pynshisha ïa ki kot ki sla bad dei ruh ban don ka muhor (seal) bad jingsoi (Signature) na ka tnat DMR, hynrei haba ngi la bishar ïa ki kot ki sla katei ka kali ba ioh bat kam shym la don ia kita” ong u bah Sambormi Lyngdoh.
Kumjuh ruh katkum ka shithi ba la buh ha u Deputy Commissioner, ka seng ka la pynpaw ba ki don ki nongkhaïi kiba khaïi beaiñ ki ba khlem bud ïa ki jingbthah kiba katkum ka Notification No. MG19/2019/189, Dated Shillong, the 08th of November 2022, Mining and Geology Department, Government of Meghalaya, kiba khlem ïoh ïa ka jingbit ne ap approval na u Secretary jong ka Mining and Geology Department Meghalaya.
La ong ruh ba lada kum kine ki kam beaiñ kiba khlem biang ki kot ki sla, ki dang ïai bteng kan wanrah jingeh ïa ka imlang ka sahlang ha ka thaiñ.
Ka seng ka la kyntu ïa u Deputy Commissioner ba un shim khia halor kane ka kam ban khanglad noh shi syndon ïa ki kali kiba wanrah dewïong shapoh ka distrrict kiba khlem biang ki jot ki sla.