Shim bynta ki karkhana Byrnihat ha ka prokram ai jinghikai ba shisngi halor ka Annual Survey of Industries
Nongpoh, Ïaiong 06: Kumba 30 tylli ki karkhana naka thaiñ Byrnihat kila leit ban shim bynta haka prokram ai jinghikai ba shisngi halor ka Annual Survey of Industries 2021-22 bala pynlong da ka National Sample Survey office, Field Operations Division (NSSO) (FOD), Regional Office, Shillong, Ministry of Statistics & Programme Implementation (MoSPI), jong ka Sorkar India bad Byrnihat Industries Association haka 5 tarik mynta u bnai ha Conference hall jong ka Maithan Alloys ltd ha Byrnihat.
Ka NSSO, FOD kadei kaba don bynta ban pynlong ïa ka jingjurip ha ki bynta bapher bapher ha kylleng ka thaiñ. Ka Annual Survey of Industries (ASI) kadei kawei na ki tyllong jong ka Industrial Statistics ha India, kaba ai jingtip shaphang ki jingkheiñ jingdiah ban peit bñiah ïa ki jingkylla ha ka roi ka par bad ka jinglong jong ki kam shna mar kynthup ki kam ba ïadei bad ka jingshna tiar, ki kam maramot, gas bad jingpynpoi um bad ka jingbuh pyndait thah bad kiwei kiwei.
Kane ka jingjurip ka ai ka jingtip ba kongsan ban kheiñ ïa ka Gross Domestic Product (GDP) jong ka ri. La pynlong ïa ka jingjurip shisien shi snem hapoh ki kyndon jong ka Collection of Statistics (COS) Act, 2008 (kumba la pynkylla ha u 2017) bad ki kyndon hapoh ka aiñ ba la wanrah ha u 2011.
Haba ai jingkren ha kane ka prokram ai jinghikai, u N. Mohondas Singh, Joint Director & Regional Head, NSSO (FOD), RO Shillong u la ban jur ïa ka jingdonkam jong ka ASI data ha ka jingkheiñ ïa ka GDP jong ka ri bad u la kyrpad ïa baroh ki karkhana na ka bynta ki jingpynkhreh hi bad ban phah ha ka por ïa ki jingsiew.
U la ai jingtip ba kito kiba ïaid lait ïa kane ki lah ban shah pynshitom katkum ki aiñ ba la saiñdur hapoh ka Statistics Act 2008. U la ong ruh ba la pynlong ïa ka katei ka prokram ai jinghikai ban plielad ïa ka jingpynkhreh hi bad ban pynthikna ka jingphah ha ka por ïa ki jingsiew jong ki karkhana.
Ha ka jingmihkhmat ïa ka kynhun, u P.K. Mishra, Director, Maithan Alloys Limited u la ai khublei ïa ka NSSO(FOD) kaba la pynlong ïa kum kane ka camp kaba kongsan bad kyrpad ïa baroh ki karkhana ban phah ha ka por ïa ki jingsiew ban lait na kano kano ka jingshah pynshitom katkum ka aiñ pyrshah ïa kito kiba ïaid lait bad ban ai ka jingïatreilang bad ki ophisar kiba wan jngoh ïa ki karkhana.
Ha kane ka jingïalang la ïadonlang ruh ki heh ophisar jong ka NSSO (FOD), RO Shillong bad kiwei kiwei.