Halor ka jingkordor jong ki jingbam tynrai pynlong Workshop ka SURE ha Jowai

“Ki mar bam tynrai ki long ki dawai ha ka koit ka khiah” D.V. Lyngdoh, MCS

0

Jowai, Ïaïong 07 : Ka Society for Urban and Rural Empowerment (SURE) Jowai, ha ryngkat ka jingïatreilang bad ka ophis North East Slow Food Agrobiodiversity Society (NESFAS) Shillong ha ka sngi Palei 6 tarik u Ïaïong kala pynlong ïa ka ‘Cluster Sharing Workshop’ ha Madan Tympang Club Iaw Musiang Jowai.
La pynlong ïa kane ka Workshop ba shisngi da ka jingwan ïashim bynta lang da ki nongrep bad ki saheh sorkar halor ka project kaba ong “Ban pynkup bor ïa ki riew lum kiba dei ki trai jaka trai muluk lyngba ka rynsan Agroecology Learning Circle ban ïoh ïa ka mei ramew kaba shong shngaiñ, kaba kynthup lang ïa baroh bad kaba ïarap ban wad ki lad thymmai na ka bynta ka bha ka miat, khnang ba ka lawei kan long pahuh pahai ha ka bam ka dih”.
Na ka liang ka kong D.V. Lyngdoh, MCS Additional Deputy Commissioner West Jaiñtia Hills haba ai jingkren kum ka kongsan kala ong “Dei ban phai khmat sha ka kam rep tynrai khnang ban ïoh ïa ka jingbam kaba khuid ba suba namar ki long ki dawai ha ka koit ka khiah”.
Kala ong kino kino ki SHG ne ALC ki long shisha kum kita ki sharak kiba rah jingshai sha ki shnong ki thaw bad kiba pynithuh ïa ka shnong jong ki shabar ka Jylla bad ka ri hi baroh kawei kum ba long u shynrai Lakadong.
Kala ong ba u Sohphlang u dei u jingbam uba bang bha ban bam da kaba pyndonkam ïa ka rukom rep ïa u katkum ki jingstad tynrai naladei hi kala long ka jingtip thymmai ha kine ki sngi ba mynta.
“Ha kum kine ki sngi shibun na ki jait jingpang kiba ktah ïa u briew kiba ym lah shuh ban batai la ki wan na ka lyer, na ki jingbam ne da kiwei de” hynrei ka por kala dei ban kyndit bynriew noh ba ngi dei ban phai khmat noh sha ka kam rep tynrai kaba long ka jingmyntoi kaba khraw ha ka koit ka khiah, ong ka kong Lyngdoh.
Kala ong wat ha ki por jong ka khlam Covid-19 baroh baroh ki ïa kynduh jingeh ban ïoh jingbam khamtam ki jhur hynrei lyngba ka jingdon ki nongrep tynrai, kila lah ban pyndap pynbiang ïa ka jingdonkam ha ka bam ka dih ban pynpoi ïa ki jhur kiba khuid ba suba.
Kum ki longkmie ban pynkiew ïa ka ïing ka sem ka kong Lyngdoh ka ong ngi dei ban pynneh pynsah ïa ka riam tynrai hakhmat jong ka pyrthei khnang ba kane ruh kin long kaba sah pateng la pateng na ka bynta ki khun ki ksiew lashai la shi sngi bad ba kim nym shah tuh ha kiwei pait ki jaitbynriew ba nabar.
Ha kaba ïadei bad ka bam tynrai kala kyntu ban pynneh pynsah da kaba ai nuksa mynta kiba bun hi ki khynnah rit ki kwah ban bam da ki jingbam ba lai phew jait kum ki Chow, Momo, Pisa bad kiwei bad kyntait noh ïa ki jingbam tynrai kila sdang ruh ban klet noh. Halor kane ka ong dei ban pynim ïa ka jingbam tynrai da ka jingïatreilang naduh ki bor sorkar haduh ki nongrep.
Kala ai khublei kyrpang ïa ka SURE kaba la trei ïa kane ka bynta kaba khraw eh ban pynneh pynsah ïa kane ka tynrai ha ka bam ka dih lyngba ki nongrep, kumta ka kyntu ïa ki nongrep ba kin nang kiew shaphrang ha ka ban pynmih ïa ki mar rep tynrai bad kane kan pynkiew ruh ïa ka ïoh ka kot jong ka jylla da kaba ym donkam shuh ban shañiah ïa ki mar rep kiba wan nabar.
Ïa ka jingïalang la pynïaid da u ma Heimonmi Suchiang Community Facilitator Thadmuthlong C, la ïoh ruh ka jingrwai na ka shnong Sohmynting, ka jingkren na u ma H.H. Mohrmen Secretary SURE, la batai bnai ïa ka rukom pynmih ïa ki mar rep tynrai da ki nongrep kiba kynthup na Mukhap, Lumtrep, Mynso, Muphlang bad Sohmynting kiba la batai ïa ka rukom rep naduh u Kubi, Sying, Shynrai, Sohphlang bad kiwei. La batai kumjuh shaphang ka Community Seed Bank da ka Iaraplang PGS/ALC Mulum.
Kiwei de kiba ïadonlang ha kane ka sngi ki long u bah S. Ranee, District Horticulture Officer WJH kum u symbud kongsan, u ma S. Lyngdoh, DPM, CLLMP, ma D. Phyllei, Assistant Director Horticulture, kong D. Pasweth ADO Namdong Circle, bah G. Mylliem, BDO Amlarem Block, ma. L. Suchen, Skill Development officer nalor kiwei de ki ophisar sorkar, Katba ïa ki kyntien ai khublei la ïoh na u ma Ribaitmiki Ryngkhlem, Community Facilitator, Madur.
Hadien kane ka prokram la don ka jingleit jngoh ha manla ki Stall ba wanrah ïa ki mar rep tynrai bapher bapher.

Leave A Reply

Your email address will not be published.