Shillong, Ïaiong 07 : U Myntri ka tnad Ports, Shipping & Waterways and Ayush ka sorkar pdeng, u Sarbananda Sonowal u la kdew ïa ka jingjop jong ka Assam ha kaba pynlong ïa ki ar tylli ki Yoga Mahotsav ha kine ki snem bad kam ruh ba ka Assam ka la kylla long ka jaka wan leh yoga kaba pawnam bha mynta ha ka Ri.
Ïa kane u Myntri u la pynpaw haba kren ha ka jingïalang plie pyrda ïa ka jingsdang jong ki 75 sngi shwa ka International Day of Yoga, 2023 ka Yoga Mahotsav kaba long ha Dibrugarh ha kane ka sngi Thohdieng ïa kaba la pynlong da ka Ministry of Ayush.
Ha kane ka lympung ki la don buh bha ki riewshemphang na kylleng ki bynta jong ka thain shatei lam-mihngi jong ka Ri kynthup naduh utei u Myntri ka sorkar pdeng, nangta u Myntri Rangbah ka Tripura, u Prof (Dr) Manik Saha, Symbud Myntri Rangbah ka Arunachal Pradesh, u Chowna Mein, Symbud Myntri Rangbah ka Meghalaya, Prestone Tynsong, u Myntri Khynnah ka tnad Foreign Affairs ka sorkar pdeng u Rajkumar Ranjan Singh, Myntri Khynnah ka tnad Petroleum & Gas u Rameshwar Teli bad kiwei kiwei.
Ha kane ka jingwan u Sonowal u la buddien ruh ïa ka jingpyntrei ïa ka Panchakarma block bad ka Pharmacology & Chemistry Lab ha Central Ayurveda Research Institute (CARI) block. U Myntri u la pyntip ruh ba ïa kitei ki jingtei yn sa pyndep noh hapoh u 2023.
