Ha Manipur yn ïakhun ka India pyrshah ïa ka Myanmar bad Kyrgyzstan ban pynkhreh AFC Asian Cup

Imphal, Lber 21 : Ka kynhun ialehkai ka Ri iakhun ia ka lympung ialehkai barri kaba nyngkong eh mynta u snem pyrshah ia ka Myanmar ha ka Tri-Nation International Football Tournament 2023 ha Khuman Lampak Stadium ha Imphal, Manipur mynta ka sngi Balang.
Na ka liang u kapten ka kynhun u Sunil Chhetri bad ka kynhun kin ïakhun pyrshah ruh ïa ka Kyrgyzstan ha katei kajuh ka jaka ha ka 28tarik mynta u bnai. Lah ban kdew hangne ba ka kynhun ïalehkai phutbol ka ri ka la mih madan khatduh ha ki lympung ïalehkai barri pyrshah ïa ka Vietnam naduh u Nailur jong u snem ba la dep. Ha katei ka jingïakhun ka India ka la shah rem haduh 3-0 kol.
Kitei ki jingïakhun mynta ka kynti ki long ruh artad kum ka jingpynkhreh jong ka Ri na ka bynta ka lympung 2023 AFC Asian Cup kaban long ha u Kyllalyngkot jong u snem ban wan.
Ïa mynta hi, ka India ka don ha ka kyrdan kaba 106 ha ka jingphiah kyrdan jong ka FIFA, katba ka Myanmar bad ka Kyrgyz Republic pat ki don ha ka kyrdan kaba 159 bad 94.
Na ka liang u head coach ka kynhun u Igor Stimac u la u jied 23 ngut ki nongïalehkai na ka bynta katei ka lympung ba hynñiew sngi.
Nalor u Chhetri, kiwei pat ki rangïalehkai ba donlang ha ka kynhun ki kynthup ïa u rangap kol u Gurpreet Singh Sandhu, nangta u Sandesh Jhingan, Jeakson Singh bad ruh u Lallianzuala Chhangte.
Dang ha kane ka sngi u Blei, u Pritam Kotal bad ruh u Naorem Mahesh Singh ki la shah khot ban donlang bad ka kynhun ha jaka jong u Sivasakthi Narayanan bad Glan Martins kiba la hap ban shong ben noh naka daw ka jingmynsaw.
Kiba bun ki rangïalehkai ki la poi ha jaka kilan met ha Kolkata ha ka 16tarik mynta u bnai katba kiwei pat kiba don bad ki kynhun ha ka final ISL, ki la wan sha ka kynhun ha ka 18tarik