Nongpoh, Jylliew 26: Ka tnad pulit jong ka Ri-Bhoi mynta ka sngi ka la rakhe ïa ka International Day Against Drug Abuse and Illicit Trafficking ha kylleng ki jaka bapher bapher ka them Ri-Bhoi, ryngkat ka jinghikai bad pynsngewthuh halor ka jingma bad ka jingktah u drok ïaki khun samla bad ka imlang ka sahlang ha kane ka juk mynta.
Kane ka jingrakhe ka long khamtam eh na ka bynta ki khynnah, khnang ba ka jingsngewthuh kan long naduh ba ki dang don haka rta kaba ki dang heh dang san bad donkam ïaka jinghikai. Ha kane ka jingrakhe na ka liang ki pulit haki police station bapher bapher naduh ki ophisar kila leit ban ai jinghikai sha ki jaka bapher bapher ba kum ki khynnah bad ki samla ki donkam ka jinghikai kumno utei u jait jingdih u ktah ïaka met bad ka bor pyrkhat tad haduh ba un teh kynjri ïa ka jingim jong ki bad eh ban bthat haba ki la ngop.
Naka liang ka tnad pulit ka la kyntu ruh ïaki khun samla ban kiar lai lum lai wah na utei u jait jingdih bad ban hikai lem ruh ïa kiwei ba kim dei ban ktah da lei lei ruh khnang ba ki khun samla kin kiew shaphrang bad shakhmat ha ka jingpule bad ka jingim bad ruh ba ka imlang ka sahlang jong ngi kan lait na u drok.
