Khliehriat Jylliew 26: U heh sorkar uba dei u Technical Expert on Environment, Forest, u N. Bhattacharjee ha ka jingwan jurip ïa ki ar tylli ki shnong ha East Jaiñtia Hills Distric, ka shnong Ïongkaluh bad shnong Kairang, haba kren shaphang ka rep ka riang u la ong ba ka jylla Meghalaya ka don ka jinglah bad ka don ka lad ka kabu ba kan long kum kawei na ki ri ka ban lam khmat (leading organic hub) ha kaba pynmih ïa ki mar rep kiba khlem pyndonkam dawai kum u shynrai, u sohmarit, u sying bad kiwei kiwei ki jait mar rep.
Haba kren ha ka jingïalang ha shnong Ïongkaluh, u Technical Expert on Environment, Forest, u la ai ka jingkhublei kitobok kitrwiang ïa baroh ki nongrep bad kumjuh ruh ïa ki kynhun Farmers Production Group (FPG) kiba la trei shitom bad nohsyniang shibun eh ha kaba kyntiew ïa ki mar rep kum u shynrai Lakadong, uba la paw nam bha ha ri India bad wat shabar ri ruh kumba la ïohi ha ka G7 Summit.
U Bhattacharjee, u la ai mynsien ïa ki paidbah nongrep bad u la ai ruh ka jingkhublei kitbok kitrwiang ïa ki ba kin nang lah ban kyntiew shuh shuh ïa ka rep ka riang bad ba kin nang lah ruh ban pynneh pynsah ïa ka rep ka riang kaba dei ka kam kamai ja kpoh kaba naduh ki por ba rim lane ka Traditional sources of Livelihood, haba kren shaphang ka project jong ka Community Livelihood Improvement Projects (CLIP) u la ong ba kane ka dei ka project ba kyrpang na ka bynta kito ki jaka kiba shah ktah na kaba tih ia ki mar pohkhyndew bad ka thong jong ki project ka long ban pynneh pynsah ïa ka kam rep kaba dei ka kam kaba ki briew ki trei naduh ki por ba mynshwa eh, u la iaroh ïa ka jinglah ki nongrep ban trei ïa ki kam rep khamtam kito kiba la iohjingmyntoi ne ki beneficiaries bad pynsngew ba ka kynhun kan sa nang ïaid shuh shuh ban jurip sa sha kiwei kiwei ki shnong ban ai ki jingkyrshan ïa ki nongrep kiba don ha ki jaka ba shah ktah na kaba tih mar pohkhyndew, u la pyntikna ruh ba na ka liang ka sorkar kan sa ai ki jingiarap lyngba ki tnat kiba dei peit ha kaba ïadei bad ka mat ban pynneh pynsah ïa ki jingthung kiba long dawai lane ki medicinal plants, yn ai jingïarap ruh ïa ki paidbah lyngba ka tnat agriculture bad horticulture.
Ka jingwan jurip u Technical Expert jong ka Environment, Forest, u N. Bhattacharjee lem bad ka kynhun, hynnin ka sngi ïa ki ar tylli ki shnong ha East Jaintia Hills District, ha Ïongkaluh bad ha shnong Kairang, ka long kum shibynta ban kyntiew ïa ka rep ka riang bad ruh ban pyntikna ïa ka jingtreikam ka tnat Community Livelihood Improvement Projects (CLIP) bad ka jingtreikam ka Meghalaya Environment Protection and Restoration Fund (MEPRF) ha kaba iada ïa ka khyndew bad pynneh pynsah ïa ka mariang sawdong, ka kynhun ka la jurip ïa ki ar tylli ki shnong kiba don ha East Jaiñtia Hills District, ka shnong bad ki la jurip ruh ïa ia ki jaka rep ba don ha kine ki shnong.
Kiba la ïa don ryngkat lang ha kane ka jingwan jurip u Technical Expert on Environment, Forest, ki kynthup ruh ka IFS, Conservator, Forest Department, ka kong H.Lato, u Chairman, Block Resource Management Committee (BMRC), bah Shri D.S Wankhar, u Secretary, Block Resource Management Committee (BRMC), bah Shri A Laloo, ka District Programme Manager, State Rural Employment Society (SRES), East Jaintia hills District, ka kong Sandalin Sutnga, ki nongialam shnong, ki dkhot jong ka Farmer Production Group bad kiwei kiwei ki riew rangbah lem bad ki nongrep.
