Watla ym pat don ka surok ba biang khring ka Rilang view point ïa ki nongshangkai suwari

Nongstoiñ, Jylliew 26: Ka Rilang view point ka dei ka jaka kaba don shaphang mihngi na ka shnong Nonglait Eastern West Khasi Hills district bad ka long ruh ka jaka kaba itynnad haduh katta katta kaba la sdang ban khring ïa ki nongshangkai suwari na kylleng ki jaka. Ban poi sha katei ka jaka hap ban ïaid na Kynshi Bangla sha Lawbyrtun , Mawkyllei bad kham shakhmat na ka shnong Mawkyllei ka don ka surok kaba poi haduh ka shnong Rngikseh bad kumba shiteng kilomitar eiei ka don ka surok khyndew ka ïaid shaphang kadiang.
Ha ka jingleit peit jong u nongthoh khubor jong u Mawphor ïa katei ka jaka ha kane ka sngi thohdieng ka 26 tarik Jylliew la la hap ban ïaid lyngba ka surok kaba khohruh khohram haduh ban da poi ha ka jaka ban hiar sha ka them kaba ki khot ka Remkhla valley project. Ha katei ka jaka ka wah Rilang kaba mih na shaphang ka shnong Lawbyrtun tuid shaphang shathie bad ka don ka jingkieng doi doi kaba itynnad bha ban kam ïa ka wah Rilang sha shliang bad ïa katei ka jingkieng la tip kum ka jingkieng Ïawjat.
Ha katei ka jaka ki don ruh ki nongtrei kiba trei ïa ka lynti ïaid kjat ban kiew shaduh kliar jong u lum ha kaba lah ban ïohi ïa ka jingitynnad jong ki sawdong sawkun jong katei ka jaka.
Ha katei ka sngi la ïoh ruh ban ïakren bad kitei ki nongtrei bylla ha kaba ki la ïathuh ba ka jingpyntrei ïa kitei ki jingkieng bad lynti ïaid kjat ka dei kaba la pyntrei da ka skhim MNREGS lyngba ka Mawthadraishan C & RD Block .Haba kylli pat la katei ka jaka ka dei ka jong ki riew shimet ne kadei ka khyndew kur ki la ïathuh ba katei ka jaka baroh ka dei ka khyndew jong ka kur Lyngdoh Nonglait.
Ha katei ka sngi la ïakynduh ruh shibun ki nonmgwan shangkai suwari kiba dei na ka jylla Assam bad kiwei kiwei ki jylla kiba la wan da ki kali ar shaka ban shangkai pyngad ha katei ka thaiñ. Wat la katei ka jaka ka long kaba itynnad bad kaba khring ïa ki nongwan shangkai suwari hynrei na ka jingbym don ïa ka surok kaba biang ka dang shem shitom bha. Ha kajuh ka por la lap ba ïa ki jaka shongkai dang sdang ban shna namar haduh mynta ym pat don kawei ruh ka jaka shongkai pyngad.
Haba phai ha ka jingitynad bad ka jinglong jingman jong katei ka jaka ka la idon kam ba ka sorkar lyngba ka tnad jingohkai ka la dei ban phaikhmat kyrpang na ka bynta ban khring shuh shuh ïa ki nongshangkai suwari bad ba kan long ka jingmyntoi ïa ki paitbah nongshong shnong ha kiba bun ki liang.