Dawa ka VPP ban pyntreikam pura ïa ka UGC pay scale na ka bynta ki nonghikai College

Shillong, Jylliew 26 : Ka VPP mynta ka Sngi Thohdieng ka la pynpaw ka jingpyrshah halor ka jingpyrshang jong ka sorkar ban pynduna suki pa suki ïa ka deficit grant- in- aid ïa ki College bad kumta ka dawa na ka sorkar ba dei ban pyntreikam beit da ka UGC Scale bad ki DA ïa ki Nonghikai kiba la tbit bad hikai ha ki Deficit College.
Ha ka shithi ba la phah sha u Myntri ka tnad pule puthi ka VPP ba ka jingpyrshang ba dang shen ban pynkylla ïa ki rukom treikam da kaba ñiew poh ïa kaei kaba la tei ïa ki tnad pule ba shalor nalor ba ka sorkar MDA ka kob ba ka buh hakhmat eh ïa ka pule puthi ha ka jylla.
Ka VPP ka pynpaw ba ka Deficit Grant-in aid ka dei kawei na ki tyllong na ka bynta ban pynïar ïa ka pule puthi.
“ Ka Deficit Grant-in aid ka la trei bor bah bha na ka bynta ban pynïar ïa ka pule puthi. Ka la ïarap ïa ki tnad pule ba kin poi shaduh ki jaka nongkyndong bad ban ailad ïa ki hajar ngut ki samla pule lym kumta kine ki la shu duh ei ïa ka jingnang jingstad” ong ka shithi.
“ Kumta lada don kano kano ka jingpyrshang ban pynduna, pyntlot ne pynkhleh millai jaktung ïa kane ka kam kan wanrah ka jingeh kaba khraw ha ka liang ka pule puthi hapoh ka jylla” ong biang ka shithi.
Ka Party ka la pynpaw ba ka la ïoh jingtip ruh ba ki Nonghikai kiba la tbit bad ïoh ban rung kam sorkar ha ki deficit college ki khlem ïoh satia ïa ka tulop UGS Scales. La kdew ba ka sorkar ka la pyntreikam ïa ka UGC scale sha ki Nonghikai College naduh u snem 1975 bad ïai bteng ruh haduh mynta la jan sanphew snem kata ruh khlem da don kano kano ka jingkylli ne tieng ïoh ka duna ka fund bad ki nonghikai ki ïoh tulop beit man la u bnai.
Hynrei ka VPP ka la ïoh jingtip ba ki don pat ki Nonghikai kiba la shakri ha ki deficit college kim ïoh satia ïa ka UGC scale wat ki la biang ki kyrdan jingpule kat kum ki kyndon ba la buh da ka UGC hi, ong ka VPP.
Kiba kum kine ki jingleh shilliang khmat ïa ki nonghikai ki la thung ha ka juh ka post bad shakri ruh mar kumjuh ka long pyrshah ïa ki nongrim jong ka jingleh hok .
Haba pynïasoh pat ïa kane ka kam bad ka jingïoh kam ki trai jylla, ka VPP ka ong ba ka jingpynduh ïa kine ki hok ka pyni pynban ïa ka dur ka bym itynnad sha ki trai ri namar kiba bun ki trai ri kiba la dep pyntbit sha ki kyrdan ba shalor ki don ha kane ka kam hikai. Ka don ka jingpyrshang ban khanglad ïa kane ka jingmyntoi ki trai ri, Bad kane ka pyni ruh ba kane ka polisi treikam ka long pyrshah ïa ki trai ri da kaba pynduh mynsiem ïa ki trai ri ba kin pyndep ïa ki kyrdan jingpule jongki.
Halor ka DA ka VPP ka pynpaw ba ka sorkar pdeng ka la dep pynthymmai ia ka DA da ka kyntiew sha ka 60 % hynrei ki Nonghikai ha ka jylla kim pat ïoh wat tang ïa kaba la dep ban pynthymmai kata ka 58 % ruh.
Kane ka jingpynslem ka ktah jur ïa ka pla pisa ki nonghikai. Kumta ka party ka dawa ba ka sorkar ka dei ban shim khia halor kine ki jingdawa jongka kata halor ka UGC Scale bad kumjuh ruh halor kane ka DA bad ban siew dep ruh ïa ka DA ba dang sah teng bad pynthymmai ruh da kawei ka rukom siew ha ki por ban wan.