Ban kyntiew ïa kam jngohkai pyrthei, kyntu ïa ka JTES ban pynkhie im biang ïa ka kam: F.R. Kharkhongor

Jowai, Jylliew 26: U Principal Secretary jong ka sorkar jylla u bah F.R. Kharkongor (IAS) ula kyntu jur ïa ki dkhot ka Jaiñtia Tourism and Environment Society (JTES) ban kin pynkhie im biang ïa kane ka kynhun ban kyntiew ïa ka kam jngohkai pyrthei hapoh ka Ri-Lum Jaiñtia kaba don kyrhai ïaka spahbah mariang.
Ula kyntu ruh ïa ka JTES ba wad jingïarap na ka sorkar ban pynkiew ïa ka kam jngohkai da kaba pynlong ki jingïakop naka bynta ki khun samla lyngba ki rukom ring dur khih, nalor kiwei de ban pyni ïa ki jaka kiba ym pat paw pyrthei.
Kum ban shu pynkynmaw ka JTES kaba la sdang ïaka ‘1st Discover Jaiñtia’ ha u snem 2006 haka por ba bah F.R. Kharkongor u dang long u Deputy Commissioner ka Jaiñtia Hills District bad lyngba kane ka Discover Jaiñtia la lah ban pynpaw pyrthei ïa ki jaka jngohkai kiba paw kum ki kshaid, ki krem, ki wah bad ki jaka ba itynnad hapoh ka Ri-Lum Jaiñtia.
Haba ai jingkren kum u kongsan mynta ka sngi 26 tarik u Jylliew haka prokram Workshop bala pynlong da ka Jaiñtia Tourism and Environment Society (JTES) halor ka phang “Empowering Youth through Sustainable Tourism” ha ryngkat ka jingïatreilang bad ka IQAC Kiang Nangbah College, Jowai, ula ong ba kam jngohkai pyrthei hapoh ka jylla kala dawa bha mynta namar ka jingwan tuid jong ki briew ba nabar bad kala long ka lad ïohkam ïohjam da kaba kyntu ïa ki samla pule ba kin phai khmat sha kane ka bynta.
Ula pynkymmaw haka por ba u dang long DC ka kam jngohkai pyrthei hapoh Jaiñtia Hills ka dang duna bha bad ka Jaiñtia kala paw bha tang haka liang u Dewïong, kumta ula ai jingmut balei ba ngin kren noh shaphang u maw jngohkai pyrthei bad ha kata ka por ka dang shem jingeh bha ban pynsngewthuh ïa ki paidhbah nongshong shnong shaphang kane ka kam.
Shuh shuh ula kren ruh halor ki jingkieng jri kiba khriang bha ïa ki nongwan shangkai namar ka jingskhem jong ki, da kaba kyntu ban pynbha bad pynneh pynsah ïa ki.
Ha kane ka Workshop la pynïaid da u R. Lamarr (retired Principal) ha kaba la wan ban ai jinghikai da ki ar ngut ki riew shemphang kiba kynthup ïa u Dr. H.H. Mohrmen uba dei u Columnist bad u Dr. Benjamin Lyngdoh uba dei u Professor ka tnad Tourism jong ka skulbah NEHU.
La don ruh ka kynta kylli jingkylli bala shim bynta da ki samla pule ka Kiang Nangbah, ki nonghikai bad ki nongwan sha kane ka Workshop. Ha kane ka jingïalang la ïoh ka jingkren pdiang na u Principal ka College ma H. Toi, ka jingkren na u ma M.S Lhuid (IAS Retd), ïa ka jingïalang la pynïaid da ka E. Sungoh Asst. Professor (Political Science), katba ïa ki kyntien ai khublei la ïoh da u ma S.K Lato u President ka JTES.