Ym pat don ka jingïakren ban ïakhun u President ka VPP na ki ar tylli ki Constituency: Bah Bright

Shillong, Jylliew 26 : U MLA ka VPP na Mawlai u bah Brightstarwell Marbaniang u la ong ba kam don kano kano ka jingïakren ba u President Rangbah ka Party u bah Ardent Basaiawmoit un ïakhun na ki ar tylli ki Constituency ha ka election MLA 2028.
Haba ïakren bad ki lad pathai khubor mynta ka sngi u la ong ba kam don kano kano satia ka jingthmu jong u President ban ïakhun na ki ar constituency bad kane ka dei tang ka khubor hamsaia bad ka bym shisha. “ Ym don ei ei ruh kum kata baroh ki dei ki khubor hamsaia kiba la pynsaphriang da ki liang pyrshah jongka VPP ong u bah Bright.
Halor kawei pat ka jingkylli la ong “ Nga dei u MLA jongka Mawlai bad lada ka Party ka dang ibit ban tynrong ha nga ïa ka lyngkor ba ngan kit ngan bah ïa ka Constituency ngan dang ïakhun beit ïa ka election” ong u bah Bright.
U la ong ba ubah Ardent u dei u MLA jongka Nongkrem bad lada ka party ka dang ibit ïa u ha u 2028 u ruh un dang ïakhun beit namar u juh u dieng synshar un long ïa baroh hapoh ka party. Hynrei lada ka party ka ïohi ba ym long shuh ruh u ruh un ym ïaleh hi ruh” ong biang ubah Bright.
U la ong ym don mano mano ruh hapoh ka party kiba ïoh kyrpang ka jingpynïaid bad kane ka dei ka nongrim jongka party namar baroh ki ïalong lang kumjuh.