Shillong, Risaw 20: U MDC ka BJP na Tura u Bernard N Marak u la kyrpad ïa ka jingtuklar lem jong u Myntri ka Sorkar pdeng u ba khmih ïa ka Tribal Affairs u Jual Oram ha kaba ïadei bad ka jingeh ba la mad da ki samla pule ka jylla ha kaba ïadei bad ka jingïoh ïa ki scholarship ki jong ki ha kaba u la buh ruh ka jingkylli ba ha kano ka rukom ka sorkar jylla ka ïoh bor ban ai syrnot bai bam ïa ki samla pule.
Ha ka shithi ba la phah sha u Oram ha ka sngi U Blei, u Marak u la ong ba ki samla pule kiba dei na ka kyrdan Scheduled Tribe (ST) jong ka Meghalaya ki la mad ïa shibun ki jingeh ha ka ban aplai ïa ka Scholarship naba ki la shah pan ka income certificate bad ka affidavit na ki bor ba dei jong ka jylla ha ka jaka ba kin ïoh na ki autonomous district councils (ADC), kiba dei ka bor na ka bynta ban ïarap ïa ki ST.
“Ïa ki income certificate bad affidavit ba la ai da ki Autonomous District Council dei ban pdiang na ka bynta ki samla pule ST ha ka jaka jong ki kot ki sla ba la ai da ka sorkar ban mihkhmat na ka bynta ka jylla (General),” u la ong.
Na ka liang jong u MDC u la kdew ruh ba bun na ki samla pule ki la pynpaw ïa ki jingeh jong ki ha kaba ïadei bad ka jingjyrwit jyrwat ha kaba ïadei bad kane ka kam na kaba bun na ki samla pule ki dei kiba wan na ki longïing kiba duk ba kyrduh bad kaba ki la ujor halor ka jingslem ban ïoh ïa ki scholarship kaba la long naduh ka snem ba la dep ha kaba na ka liang ki bor ba dei khmih kim pat shym la pyllait.
“Ha kaba ïadei bad kane nga kwah ban kyrpad ïa phi ban shim khia lem ïa kane ka jingeh kham kloi katba lah khnang ba ïa ki jingeh ba la mad da ki samla pule yn lah ban pyndep kloi. Kan long ka burom kaba khraw lada phi lah ban jubab kloi sha nga khnang ban pynthikna ba ki kot ki sla ne ki syrnot kum ka income certificate, affidavits bad kiwei yn lah ban ai da ki MDC/ADC na ka bynta ki samla pule ST kiba aplai ïa ka Scholarship yn lah ban pdiang khnang ba kan ym wanrah ka jingartatien hapdeng ki samla pule. Kaba khatduh ka long ba ka jylla kam dei ban long ka bor na ka bynta ban ai ïa ki Schedule Tribe naba kane kan ïalam bakla ha ka jingsngewthuh jong ki samla pule, naba ïa kane ka bor dei beit tang ki ADC kiba don ïa ka bor,” u la ong.
Na ka liang jong u Marak u la kyrpad ruh ïa u Myntri ka Sorkar pdeng ban pynjlan ïa ka tarik kaba khatduh na ka bynta ki samla pule kiba aplai ïa ka scholarship khamtam eh ïa ki samla pule ST.
