Nongpoh, Jymmang 01: Ki Pulit ka Patharkhmah Police Station ha ka step phyrngab sngi Palei ha ka por kumba 3:00 baje ki la ïoh ban bat ïa kawei kali hajan ophis PWD Patharkhmah bad ha ka jingtalasi ki la lap haduh 6 tylli ki klong thep umphniang diesel ba la antad ba ka umphniang ka don 220-230 litar.
Ki Pulit ki la ong ba ki lai ngut ki la tuh ïa ka umphniang diesel na ki lai tylli ki Tower Mobile jong ka Reliance Jio na ka thaiñ Jirang bad ïa kane la phla ruh da ki lai ngut kiba la shah kem ha ki Pulit.
La ong ruh ba ki lai ngut kiba la shah kem la suba ba ki dei ki runar kiba ju donkti ruh ha ka kam tuh umphniang Diesel ha kiwei kiwei ki jaka ba don ki Tower Mobile ha Ri Bhoi.
Kine ki lai ngut kiba la shah kem ha ki Pulit ka Patharkhmah ki dei kiba la tip kyrteng kum u Refer Marsing na ka shnong Mawtari Thaiang, u Robren Langi bad u Rishad Sylliang kiba dei na ka shnong Umkra ha Ri Bhoi District.
Ki Pulit ka Ri Bhoi ki la ai khublei ruh ïa ki nongïarap ban ai jingtip halor ka jingdon jong kine ki snar nongtuh umphniang bad dei lyngba ka jingïoh jingtip ha ka por kaba biang ba la lah ban bat bad ban kem noh ïa kine ki mentuh.
