Ha ka aiñ jong ka KHADC, u MLA Nongpoh um dei shuh u Khasi : Bah Ardent
Ka kam ai jait kpa kam dei ka kam jong ka VPP,dei ka kam jong nga shimet
Nongpoh, Jymmang 05: U President jong ka VPP, u Bah Ardent Miller Basaïawmoit ha ka por ba kren ha ka jingïalang ha Nongpoh hynin ka sngi, u la pynpaw ruh ka jingsngewkhia halor ka jingkynthoh bad ka jingthad madan ki katto katne ha ki Social Media wat ïa ka ki kti bad ka ïing ka sem jong u.
Hynnin ka sngi, ki katto katne kiba pyrshah ïa u Bah Ardent, ki la thad madan ïa ki Account ne Passbook jong i kurim bad ki khun ki kti jong u Bah Ardent ha ki Social Media ban pynpaw ba ki khun u Bah Ardent ki ai jait sha u.
Halor kane ka jingleh, u Bah Ardent, u la ong ba ki briew kiba leh kumne kidei ki bym lah satia ban wohdaw ïa u halor ki kam ba u trei bad namar ba kim ïoh daw nangno nangno ruh, ki la sdang ban ktah ïa ki khun jong u bad ïa ka ïing ka sem jong u. Kane ka jingleh jong ki, ka la pynlong ïa u Bah Ardent ban ong, “Katba phi dang ktah ïa nga shimet, nga dang lah ban shah, hynrei phi la ktah ïa ki khun te, ngam salia wat ban ïap ruh”.
Ha kaba ïadei bad ka jingai jait kpa, u Bah Ardent u la ong ba kane kane kadei ka rai bad ka mon jong u hi shimet bad um ju pynbor ïano ïano ruh. “Kam mut tang ba ai jait kpa ki khun jong u, baroh kiba kyrshan ïa ka VPP kin ai jait kpa noh. Kane kam don satia ha ka mat jong ka VPP bad ym ju don hi ruh ka jingïakren ïa kane ka mat ha ka Seng, namar kadei ka kam shimet”, u la ong.
Ha kane ka jingïalang, u la ong ba u sngewpyrshah ïa ka aiñ jong ka KHADC kaba pynduh noh ïa ka jinglong Khasi ïa ki Khasi kiba shim jait na u kpa, katba ïa ki khun shiteng tang ba ki ai jait sha ka kmie, kidei pat ki Khasi. U la ong ba lada bud ïa kane ka aiñ jong ka KHADC, ka mut u MLA jong ka Nongpoh, u Bah Mayralborn Syiem, um dei shuh u Khasi, namar ba u ai jait sha u Kpa.