Ai dorkhas ka EJNC ha u Conrad halor ka soskular tih dewïong

0

Khliehriat jymmang 5 : Ka East Jaiñtia National Council (EJNC), kaba la dep ban buh ïa ka dorkhas hakhmat u myntri rangbah ka jylla, mynta ka sngi ruh ka la ai biang sa kawei ka dorkhas kum ka jingpynkymaw ïa u Conrad Sangma ha kaba ïadei bad ka jingïatehkular ka sorkar bad kito kiba ïoh ïa ka Mining Lease ban tih dewïong kaba katkum ka Office Memorandun Vide No 25 dated 5th March 2021-Standard Operating Procedure” kaba na ka bynta kito ki don ïa ka jaka kaba heh 100 hecter kaba ïadei bad ka jingiateh kular ki trai jaka bad ki nong aplai ïa ka Mining Lease.
Ha ka memoran dum ba la soi da u President ka EJNC, u bah Sambormi Lyngdoh bad u General Secretary u bah Nangjan Dkhar, ka seng ka la pynpaw ba ha kaba ïadei bad katei ka kyntien kaba ong ba kiba aplai kim dei ki trai jaka (Applicant is not the owner of the land in question) na ka liang ka seng ka pan ka jingpynshai halor kane ka kyntien kaba ong ba u nong aplai um dei u trai jaka “namar kane kan long kum ka jingailad ïa ïa kito ki nong aplai kiba na bar ka jylla lane ka ban ailad ruh ïa ki company ban aplai bad kane kan sa ktah ïa ki briew ka thaiñ kiba im ja da ka kam tih dewïong bad kane ka rukom ïatheh kular ka lah ban shim noh ne knieh noh ruh ïa ka hok longtrai ïa ki jaka puta, kumta ka EJNC ka kyntu jur ïa u myntri rangbah ba u dei ban da bishar bniah bha halor kane ba kane ka jingtih dewïong kan dei tang ïa ki trai jylla ba kin ïatheh kular para ma ki ym bad ki bar jylla.
Ka seng ka la pynpaw ruh ba lada ka sorkar kam shim khia ban bishar bniah ïa katei ka jingiateh kular kan pynshlur ïa ki company kiba na bar ba kin wan ban shim bad pyndonkam ïa ki jaka ki puta ha East Jaiñtia Hills District bad ba kin sa ïoh ka lad ban kamai donbor tang marwei (Monopolize the coal mining), katba kiwei pat ki bym don ka lad ban ioh ïa ki jaka kiba heh haduh 100 hecter ban tih dewïong kin sa shah ktah ha ki kam ki jam bad ha ka ïoh ka kot.
“Ka East Jaiñtia National Council, kaba ieng na ka bynta ka bha ka miat jong ki paidbah ha ka jylla bad ka ri lum Jaiñtia ka kyrpad ïa ka sorkar bad ïa u myntri rangbah ka jylla ba un bishar bniah ïa katei ka kyndon kaba la buh ba kiba aplai ki dei ban don ïa ka jaka kaba heh haduh 100 hecter, namar lada ka long kumne kan buh jingeh ïa ki riew paidbah kiba kwah ban aplai ïa ka permit ban tih dewïong bad ki bym lah ban ïoh ïa ka jaka kaba heh haduh 100 hecer, kane ka kyndon kan ktah ym tang ha ri lum Jaintia hynrei kan ktah ïa ka jylla baroh kawei” pynpaw ka seng.

Leave A Reply

Your email address will not be published.