Ka jingtih dewïong hapoh Meghalaya ka kham pher haba ïanujor bad kiwei pat ki jylla ha ka ri India :Conrad K Sangma

Khliehriat, Jymmang 05 : Ki arngut ki rangba kiba na East Jaiñtia Hills District, kiba la ïoh ïa ka licence ban tih dewïong kaba dei da ka Scientific Mining ki dei u bah Nehlang Lyngdoh bad u bah Thomas Nongtdu, ha kaba u bah Leborlang Lyngdoh bad u bah Dapmaiñ Shylla, kin dei ki jingpynïaid ïa ka project lane ki Project Proponent, mynta ka sngi la pynlong ïa ka prokram ba kyrpang ha Khliehriat kum ka jingpynkup burom ïa kine kiba ïoh ban tih dewïong, haba kren ha ka jingïalang, u myntri rangbah jong ka jylla, u Conrad.K.Sangma u la ïathuh ba kane ka jingtih dewïong ha Meghalaya ka kham pher haba ïanujor bad kiwei pat ki jylla ha ka ri India.
Haba ong ba ka jingtih dewïong ha Meghalaya ka kham pher, ka dei namar ba ka sorkar India ka la ailad ba ki trai jaka ki ïoh ban kam trai ïa ka khyndew bad ïa ki mar poh khyndew katba ha kiwei kiwei pat ki jylla kam shym la long kumne bad haba kren shaphang kane, u Myntri rangbah ka jylla u la ong ba ka jingïakhun halor kane ka long kaba jwat haduh katta katta, haduh ban da lah ban pynkohnguh ïa ka Mining Ministry jong ka sorkar India, u la pynpaw ruh ka jingsngew kmen halor kane ka jinglah ban wanrah pat ïa ka jingtih dewïong ha ka jylla kaba long da ka aiñ bad da ka Scientific Mining ka ban nym kath ïa ka mariang bad ïa ka jingim briew.
U la ong ruh ba kine ki saw ngut kiba ïoh ïa kane ka license kin ai mynsiem ïa kiwei kiwei ruh ba kin sdang ïa kaba kum kane ka jingtih dewïong bad na ka liang ka sorkar ka pynshlur ïa kiwei ruh ba kin mih shakhmat ban shim ïa kane ka synjam ban tih dewïong ha kaba baroh ki lah ban aplai ïa ka mining lease, ki hap ban leh ruh ïa ka Geological Survey bad ïoh ïa ka mining policy bad kin sa lah ban sdang ïa kaba kum kane ka rukom ban tih ïa u dewïong.
Ha kajuh ka por, u la pynpaw ka jingsngew khia haba kren shaphang ka jingïalehkai politik kiwei pat ki party bad ka jingim briew ha kaba ïadei ad ka kam dewïong, khlem pyrkhat shuh ïa ki jingeh ba ki paidbah ki mad na ka daw ka jingshah khang ban tih dewïong kaba la ktah haduh katta katta ïa ka imlang ka sahlang, ïa ka ïoh ka kot jong ki paidbah “Ngam lah ban klet ïa ka jingiam kthang jong ki paidbah, don kiba ym lah shuh ban kyrshan skul ïa ki khun, don kiba kyrduh ha ka bam ka dih, don bun ki jingeh kiba mih bad pynkthang ïa ki paidbah naduh ba ka NGT ka la khanglad ban tih bad shalan ïa u dewïong bad mynta nga sngew kmen ba ki paidbah ki la ïoh pat ka lad ban trei dewïong” u la pynpaw bad u la ai ka jingkhublei kitbok kitrwiang ïa kitei ki rangbah kiba la ïoh ka lad ban tih dewïong bad ai khublei ruh ïa ki padibah jong ka district ba kin nang ïai kiew ha ki kam ki jam ha ka kamai ka kajih bad ong ba kane ka jingtih dewïong kan ïarap ruh ïa ki karkhana dewbilat kiba don ha ka district ba kin ïoh ïa u dewïong napoh ka jylla hi.
U la kular ruh ba da ka jingïohlad ban tih ïa u dewïong un sa wanrah ruh ïa ki shlem pynmih bor ding, ki Thermal plant bad kane ka ïarap ha ka jingioh bor ding ha ka jylla, kane ka dei kawei na ka jingbuh thong ka sorkar ka ban wanrah ruh ïa ka lad iohkam iohjam ïa ki paidbah.
U la ong ruh ba kane ka sorkar ba lam khmat da ka NPP kan ïai ai ka kyrshan ïa ka trei ka ktah jong ki paidbah la ka dei ha ka kam jngohkai pyrthei (tourism), ha ka rep ka riang bad kiwei kiwei lad kamai ban kyntiew ïa ka ïoh ka kot.
U Deputy CM jong ka jylla, u bah Sñiawbhalang Dkhar, u ai ka jingkhublei kitbok kitrwiang ïa kine kiba la ïoh ka lad ban tih dewïong ba ha kajuh ka por u kyntu ïa kiwei kiwei ruh ki byn pat ioh ba kin long kiba ïaishah ha kaba na ka liang ka sorkar kan sa ailad ïa ki ruh kumjuh.
U Secretary jong ka tmat Mining jong ka Meghalaya, u bah E.Kharmalki, u la ong ba kane ka jingïohlad ban tih dewïong ha ka jylla kan wanrah ruh ïa kawei pat ka lad ban pynioh ïa ka bor ding bad kane ka long ka jingkyrmen ba ki paidbah kin ïoh pahuh ïa ka bor ding bad ong ruh ba kane ka rukom tih dewïong kaba dei ka Scientific Mining ka dei ka ban nym buh jingma ïa ka mariang bad ïa ka jingim briew bad kan nym wanrah shuh ïa ki jingjia kumba ju jia ka jingiap briew ha ki thliew dewïong.
Ka MLA jong ka Sutnga Saipung Constituency, ka kong Santa Mary Shylla ka la ai ka jingkhublei sngew nguh ïa u myntri rangbah, u Conrad Sang ba u la lah ban wanrah ïa kane ka lad ban ïoh ban tih dewïong biang ha ka jylla bad ong ba kane ka dei lyngba ka jingtrei shitom jong u ha ka jingïakhun jong u bad ka sorkar pdeng tat haduh ban da lah ban pynurlong.
Kiba la ai jingkren, ki kynthup ruh, u Deputy Commissioner ka East Jaiñtia Hills, u Abhilash Banarwal, IAS, u bah Nehlang Lyngdoh, u bah Dapmaiñ Shylla, u bah Balios Swer bad kiwei kiwei, ïa ka prokram la pynïaid da u bah Iasylloki Lyngdoh.