Shillong, Jymmang 05 : U MLA ka Congress na Mawhati Bah Charles Marngar ba dei ruh u Secretary jong ka party ha ka sngi Thohdieng u la pynkynmaw biang ba kumno ki shah shukor ha ka por ba ki thmu ban thaw ïa ka sorkar ka bym dei NPP.
Haba kren ha ka jingïalang ïalap elekshon na bynta u kyrtong ka party, Bah S Osborne Kharjana kaba long ha Sohiong, na ka liang u Bah Charles u la ong, “Ngi la sngewkmen bha hadien ba la jop elekshon ban ïa thaw sorkar noh bad ka Congress, UDP, ka TMC, PDF, HSPDP bad VPP. Nga da kynmaw sah ruh ba ha ka 5tarik (Lber) ki MLA Congress ngi ap sah ha Pinewood hynrei ynda janmiet ngi tip ba ki la shukor ïangi.”
Nalorkata, u Bah Charles u la ong ruh ba katei ka jingshukor jong ki kam dei satia tang ïa ki MLA Congress hynrei kadei ka jingshukor ïa ka Jaidbynriew.
Shuh shuh u kynnoh ruh da kaba ong ba ha shwa ka elekshon ki kawang ktieh iwei ïa iwei pat hynrei mar ïa dep ka elekshon pat ki la thiah lang, bamlang ha kajuh ka pliang.
U Bah Charles u ong ruh ba ki paidbah mynta ki la sngewthuh bad ym da donkam shuh ban pynshai namar ki la dep ïohi lut. Kawei pat kaba utei u nongïalam ka party u kyntu ïa ki paidbah ka long ba kim dei satia ban leh shongshit than namar ha kaba kut hi hadien ka 13tarik ki paidbah ki hap ban leit trei biang, leit rep leit riang kumba ki leh baroh shi katta.
“Kaei kaba nga mut ban ong ka long ban jied da ka jingstad bad ka jingshemphang ym ban shah ïalam bakla.”
Lah ban kdew hangne ba ka jingjied nongmihkhmat thymmai ha Sohiong Constituency kan long ha ka 10tarik mynta u bnai.
