Jowai, Jymmang 05: U Superintendent of Police ka West Jaiñtia Hills District ula pyntip shi bynta ban pyntreikam ïa ka hukum jong ka Central Motor Vehicle Rule-1989 U/S 104, 138 and 138(4) (c), la bthah ïa baroh ki trai bad ki nongñiah kali ba kin pyndait ne tah ïa ki ‘Radium Reflector’ ha ki kali ki mator jong ki kumjuh ïa ki ar shaka, khnang ban lait na kino kino ki jingjia ïatakhuh kali (accident) ba khah khah.
La pyntip da u u Ankit Kumar, Delhi, NCR, Ghaziabad, Uttar Pradesh ba ka jingpyndait ïa kitei ki Radium ha ki kali mator bad ka jingpynpoi ïa ki First Aids box sha ki trai bad nongñiah kali hapoh ka West Jaiñtia Hills District kan treikam naduh ka 01.05.2023 tad haduh ka 31.05.2022.
La pynbeit ban leh ïa ki Radium Reflector da ki briew ba la buh ka long katkum kane ka dor: ïa ki ar shaka (Bike, Scooty, Bicycle) ban leh ‘etching’ bad ‘Radium Reflector’ ym donkam jingsiew, ïa ki kali 4 (saw) shaka ban leh etching ka long 20 tyngka bad Radium Reflector 50 tyngka. Ki kali 6 shaka ba kit mar ban tah etching 30 tyngka bad Radium Reflector ka long 100 tyngka, ïa ki kali 10 shaka ban leh Radium Reflector, First Aid Bok bad Fire Stop kan long 300 tyngka. Katba ki kali sorkar kim donkam jingsiew. La ïathuh ba ka jingpyndait ïa kine ki Radium Reflector kan ïarap shibun eh ban ïohi bha ïa ki kali ba wan mar pyrshah la ha ki por mynmiet ne ha ka por mynsngi.
Baroh ki Officer Incharge (OCs) bad ki Incharge (ICs) hapoh ka West Jaiñtia Hills kin peit bniah ïa kane ka jingpynbeit khnang ban yn lah ban pyntreikam ha baroh ki kali bad ki ar shaka hapoh ka District.
Lada jia ban don kino kino ki jingujor na ki nongthied nongped, ïa kane ka yn tohkit syndon da ki OCs bad ICs bad ïa ka jingaibor ïa ki yn weng noh shi syndon da ka ophis u Superintendent of Police ha kano kano ka por.
