Khliehriat, Jymmang 5:-Ki bor pulit jong ka East Jaiñtia Hills District, ha ka 4 tarik mynta u bnai ki la ioh ban kurup ïa u drok heroin uba don ka jingkhia kaba 65.32 gram na ki arngut ki briew kiba la wan da kawei ka kali Tata truck kaba dei na Assam kaba la wan na ki bynta ka Kalian ban leit sha ka thaiñ Khliehriat, EJHD.
Na ka liang u Superintdent of Police ka EJHD, lyngba u kyrwoh u pyntip ba hadien ba kila ioh ïa ka jingtip kaba bniah halor ka jingdon jong ki arngut ki nongkhaïi drok ki la pynlong ka jingap shrip ha Byndihati petrol pump ha ka por 9:45 mynmiet jong ka 4 tarik mynta u bnai ha kaba ki la ïoh ban bat noh ïa katei ka trok 12 shaka kaba kit dewbilat kaba don ïa u No AS-028-AC-0492.
Hadien kane ki pulit ki la bat noh ïa ki arngut ki suba donkti kiba don hapoh kane ka kali ïa kiba la tip kyrteng kum u Jaydar Ali bad u Sanidul Islam kiba dei na Barpeta Assam.Hadien ka jingkhynra ki pulit ki la ioh ban kurup ïa 0hynriew song ki synduk sabon, kawei ka plastik thep duma rong jyrngam, kawei ka song kaba don ia ki suba powder rong stem, kawei ka mobile phone bad ka pisa T.500 na u Jaydar Ali.
Hadien ba la leh ïa ki jingdonkam baroh hapoh ki kyndon jong ka NDPS Act bad ha ryngkat ka jingïadon lang ki nongsakhi ba laitluid, la pynlong ka jingleh test ïa kine ki powder ha kaba la shem ba u dei u drok heroin uba don ka jingkhia kaba 65.32 gram.
Ha kaba ïadei bad kane ka jingjia la rejistar case hapoh ki kyndon jong ka Khliehriat PS Case No.32(5)2023 u/s 21(b) 29 NDPS Act bad ka jingtohkit bniah ha kaba ïadei bad jingioh kurup ka la ïaid shakhmat.
