Ha ka sien kaba 6, rah biang ka Nativity HSSM ïa ka nam jop ha ka Chief Minister’s DLI-SAM 2023 ha Mawkyrwat
Mawkyrwat, Jymmang 05: Ka Nativity Higher Secondary School, Mawkyrwat ka la long kawei na ki 26 tylli ki skul kaba la rah ïa ka nam lahduh ha ka lympung ïalehkai jong ki khynnah skul ba la tip kum ka ‘9th Chief Minister’s District Level Inter-School Athletics Meet 2023, South West Khasi Hills District’ ba la pynïaid da ka ophis u District Sports Officer, South West Khasi Hills District hapoh madan Saitsnad, Mawlangwir, South West Khasi Hills District.
Lah ban kdew ba ka jingrah jong ka Nativity Higher Secondary School, Mawkyrwat ïa ka nam lahduh ka lah ban dei ruh ka sien kaba 6 bad ïa kane ka 9th Chief Minister’s District Level Inter-School Athletics Meet 2023, South West Khasi Hills District ba la pynlong mynta u snem la sdang naduh ka 3 tarik u Jymmang, 2023 bad la ïoh ban pynkut noh mynta ka sngi ka 5 tarik u Jymmang, 2023 ha kaba haduh 26 tylli ki skul bad 824 ngut ki ‘rang ïalehkai bad ki ‘thei ïalehkai na ki skul ki la wan ïashimbynta.
Haba phai ha ka March Pass ba la pynïalehkai ha ka sngi ban pynkut ïa kane ka lympung ïalehkai na ki 26 tylli ki skul ki don baroh 12 tylli ki skul kiba nongïashimbynta bad ïa ka nam lahduh la rah da ka Maharam Government Higher Secondary School, Mawkyrwat katba ka Presbyterian Higher Secondary School Mawlangwir ka la ïoh ïa ka nam Best Discipline School.
Ha kaba ïa dei bad ki khusnam shimet ne Best Athletes la ïoh da u Damewanshwa Marngar jong ka Maharam Government Higher Secondary School, Mawkyrwat bad ka Ibandariakor Nongsiej jong ka Nativity Higher Secondary School, Mawkyrwat kiba dei jong ki khynnah ba 14 snem, nangta u Waiborlang Syiemlieh jong ka Rising Secondary School, Sohkhyllam bad ka Latympang Lyngdoh Marshillong jong ka Nativity Higher Secondary School, Mawkyrwat kiba dei jong ki khynnah ba 16 snem, katba u Batskhemlang Thongni Rit jong ka Sngap Syiem College, Mawkyrwat bad ka Lavinia Lyngkhoi jong ka Maharam Government Higher Secondary School, Mawkyrwat kiba dei jong ki khynnah ba 18 snem.
Ïa ka nam lahduh ha ka kynhun jong ki kynthei ne Best Teams – Girls la rah da ka Nativity Higher Secondary School bad ba wan ba ar ka Maharam Government Higher Secondary School katba ka kynhun ba lahduh jong ki shynrang ne Best Teams – Boys ka dei ka Nativity Higher Secondary School bad ba ar ka dei ka Jakrem Presbyterian Higher Secondary School bad ïa ka nam lahduh jong mynta u snem 2023 ha kane ka 9th Chief Minister’s District Level Inter-School Athletics Meet 2023, South West Khasi Hills District la rah da ka Nativity Higher Secondary School, Mawkyrwat ha kaba ka la ïoh haduh 19 tylli ki takma ksiar, 16 ki takma rupa bad 12 tylli ki takma rnong.
Ïa kane ka 9th Chief Minister’s District Level Inter-School Athletics Meet 2023 la wan ban pynhap pyrda da ka kong Y. Mawlong, Additional Deputy Commissioner, South West Khasi Hills District ha kaba ka la ai ruh ki kyntien jingkhublei na ka bynta baroh ki nongïashimbynta kynthup naduh khynnah skul, ki nonghikai bad kumjuh ruh ki nongpynïaid kiba la trei shitom bad pynlong ïa kane ka lympung ïalehkai kaba jop ha ki bynta baroh. Ka kyrmen ruh ba lyngba ka jingjop jong ki nongïashimbynta shitrhem jong ki khynnah skul ha ki bynta bapher bapher kan pynlong ïa ki ba kim lah ban pynïoh ha ki ïa ka met ba koit ba khiah bad ymtang kata ka lah ruh ban pynlong ïa ki ba kin long smat bad khamtam eh ba da ka jingjop jong ki kin lah ruh ban leit ïashimbynta ha ka State Level bad kumjuh ha ka Ri India ruh.
Ka la kyntu namarkata, ba lyngba kine ki lai sngi ba kum ki khynnah skul ki la ïoh ban ïashimbynta ka ai ruh ha ki ba kin long borabor ki khynnah kiba trei shitom ym tang ha ki jingïalehkai hynrei khamtam eh ha ka liang ka pule puthi khnang ba kin ïai kiew na kawei ka kyrdang sha kawei pat.
Ha kane ka sngi pynkut la ïadonlang u bah Damang Syngkon, District Sports Officer, South West Khasi Hills District uba la ai ki kyntien khublei, u bah D. Mawleiñ, MPS, Deputy Superintendent of Police, South West Khasi Hills District, u bah I. Laso, SDO ka PWD (R) Mawkyrwat Division, South West Khasi Hills District, u bah N. Wanniang, Myntri Shnong Mawlangwir, u bah S.K. Budnah, President ka Mawlangwir Sports Club lem bad kiwei de ki riew rangbah.