Nongstoiñ, Jymmang 5: Na ka bynta ban pynshlur ïa ki samla ba kin ïeng ha la ki kjat ha kaba seng kam seng jam, ka sorkar pdeng ha ryngkat ka jingïatreilang bad ka sorkar jylla lyngba ki Block Ophis, ka la pynlong ïa ka rynsan thaw kam ha Nongstoiñ ha kaba ka la khot la wer ïa ki samla shynrang bad kynthei na West Khasi Hills, ba kin wan ban wad jingtip na katei ka rynsan thaw kam kaba la tip kum ka Job Mela.
Ïa katei ka rynsan thaw kam la pynlong ha madan jong ka shnong New Nongstoiñ ha kaba la plie da u bah T.Diengngan Block Development Officer ka Nongstoiñ C&RD Block. Naduh ba sdang hi ki samla shynrang bad kynthei na kylleng ki shnong hapoh ka District, ki la tuid sha katei ka madan ban leit wad jingtip bad pan jingïarap, kumno ba ki lah ban ïeng ha la ki kjat na ka bynta ban kyntiew ïa ka ïoh ka kot ka jong ki.
Ha kaba ïadei bad katei ka Job Mela la ïoh ban ïakren bad u bah Lamphrang Dhar u ba dei u nongpynïaid ïa katei ka mela, ha kaba u la ïathuh ba katei ka prokram ka dei kaba la buh khnang, tang na ka bynta ki smala shynrang bad kynthei kiba la pass ïa ka class VIII shaneng bad kiba la kynjoh khat phra snem haduh 35 snem.
Nalor kata u la ong ruh ba ha katei ka mela ka sorkar ka la phah ïa ki briew kiba la dep pyntbit ha kiba bun ki kam bad la phiah ruh hala ki jong ki jong ki bynta kiba ïadei bad ka sap kaba ki samla ki don. Kitei ki briew kiba ka sorkar ka la phah ki hap ban shim kyrteng bad ban ïa pynshai ha ki samla kiba kwah ban seng kam, katkum ka sap ba ki don bad kin pynbiang ruh ïa ki lad jingpyntip na ka bynta jong ki samla kiba la wan ban ai kyrteng.
U bah Dhar u la ong ruh ba ynda ka sorkar ka la pynbiang lut ïa ki jingdonkam, kan sa pyntip sha ki samla kiba la don kyrteng ba kin leit shah pyntbit ha la ki jong ki jong ki jing kwah jong ki. U la ong ruh ba ynda ki samla ki la dep pyntbit, ki lah da kaba suk ban seng ïa ki kam la jong ki, ba ka sorkar ka la ithuh bad kan long ka jingmyntoi kaba khraw na ka bynta jong ki.
