Nongstoiñ, Jymmang 5: U bah H.N Diengngan MDC barim ka Nongstoiñ konstitwensi u la kynthah ïa u bah Methodius Dkhar MLA ba thymmai jong ka Mawshynrut da kaba u la ong, “Ka la eh than ban ngeit ba u MLA ba thymmai u la pynïoh 63 klur hapoh 2 bnai jong ka jinglong MLA”.
Utei u MDC barim u la ong ba ka jingkam kynti jong u MLA ba thymmai kata u bah Methodius Dkhar, ka long ka bym lah ban pdiang namar tang hapoh ka 1 bnai shiteng ba u la jop elekshon. Hynrei, u la pynbna ban wanrah ïa ka skhim kaba kot haduh ka 63 klur. “Kam dei ka kam kaba suk namar wat u bah Prestone Tyngsong u ba bad kum u myntri ka tnad PWD ruh un ym lah da lei lei”, ong u Bah Diengngan.
Ïa kitei ki kyntien utei u rangbah u la kren ha ka ka jingïaynduh bad u nongthoh khubor ha ïing sah jong u kaba don ha sor Nongstoiñ hynne ka sngi, ha kaba la ïadonlang ruh u samla Ïoannis Diengngan u nongaiktien ka seng National Peoples Youth Front ka thaiñ Maweit.
Na ka liang utei u samla pat u la ong lada dei ba u MLA ba thymmai u lah ban wanrah skhim haduh 63 klur tang hapoh ki 2 bnai, u ngeit skhem ba baroh ki skhim kiba dang sahteng ha ka konstitwensi un lah ban wanrah lut hapoh ki 5 snem.
Kitei ki riew rangbah jong ka thaiñ Maweit ki la kynnoh ba u bah Methodius u la kren ïa kitei kyntien ha kawei na ki rynsan jingïalang paidbah kaba dang shen, halor ka surok Maweit ha kaba la mih ruh lyngba ki lad pathai khubor.
