Khliehriat nohprah 18: Ka shnat Khasi Authors Scoiety Khliehriat ha ryngkat ka jingïatreilang bad ka Khasi Authors Society, mynta ka sngi ka la pynlong ïa ka prokram ba kyrpang ha kaba la rakhe donburom ïa ka lyngkhuh sngi ïap kaba phraphew lai jong u myllung Soso Tham, ïa kane ka prokram la pynlong ha Jaiñtia Eastern College, Khliehriat bad u MP jong ka Rajya Sabha, u Dr W.R. Kharlukhi u la long kum u kongsan bad u MLA jong ka Khliehriat, ube dei ruh u myntri sorkar, u bah Kymen Shylla, kum u symbud kongsan.
Ha kane ka sngi la ioh ruh ban pynsngew ïa ki jingthoh ba la thoh da ki ‘riew shemphang ‘Ka sap ka kolshor khasi kumba paw ha ki poim u myllung Soso Tham’ ba la thoh da i Prof S.Dkhar; iba dei na ka Head Khasi Department NEHU Shillong “U myllung Soso Tham kum u nongkyrsiew ïa ka jaitbynriew” ba la thoh da i Dr K.Phawa; “Ka rukom pyrkhat u Soso Tham ha ka juk ba la leit bad ba mynta” ba la thoh da u Babu O.R.Chalam.
Ha kane hi ka sngi, u Dr Kharlukhi u la pyllait paidbah ïa ka kot ‘Shi Hara ki sur Myllung bad ki Esse ba la pynbit pynbiang ïa kane ka kot da u Dr Davidson Diengdoh.
Haba kren kum u kongsan, u Dr Kharlukhi, u la pyrto ïa u khraw pyrkhat ka jaitbynriew, u myllung Soso Tham bad ong ruh ba u la kren kypa ruh ïa kiei kiei ba kum ka jaitbynriew ngim dei ban long kiba beh tang ia ka spah, u kyntu ïa ka KAS ba kan hikai lem ïa ka jaitbynriew ban ieid ïa la ka jong ban kyrshan lem ïa ki riew don sap.
U la ong ruh ba na ka liang jong u kum u MP lem bad u bah Vincent Pala kumjuh ruh ka Agatha Sangma, ki la kren ha Parliament ban pynrung ïa ka ktien khasi bad Garo ha ka kyrnit ba phra jong ka riti synshar ka ri India (Constitution), u la ai ruh ka jingkhublei ïa ka KAS kaba la pynlong ïa kane ka prokram ban kynmaw burom ïa u myllung Soso Tham.
Kum ka jingpashat jingtip u bah Kharlukhi u la ong “Haba nga peit nga iohi ba u Soso tham u don ka jingiadei na ri lum Jaiñtia ruh ha kaba u u kpa jong u dei na ka jait Khar Tongper bad ka kmie pat ka jait Lyngkien Tham”
Haba kren ïa ka mynnor jong u Soso Tham, u la pynpaw ka jingsngew khia ba une u khraw pyrkhat u khlem ioh ïa kano kano ka jingkyrshan na ki briew ha kaba iadei bad ka jingnoh syniang jong u ha ka thoh ka tar bad kane ka ktah bha ha ka jaitbynriew jong ngi, u kyntu ïa ka KAS ba kan shim ïa ki lad ban hikai ïa ki briew ban tip ban kyrshan lem ïa ki riew don sap ka jaitbynriew.
U bah Kyrmen shylla, u la ai mynsiem ïa ka KAS ha ka jingiaid lynti jong ka seng ban pynrung ïa ka ktien khasi ha ka kyrnit ba phra jong ka riti synshar ka ri India bad ong ba na ka liang ka sorkar ruh kan iai bteng ban buddien, haba kren shaphang u Soso Tham, u la pynkynmaw ïa ki por ba dang leit skul kiba u la pule ïa ki poitri jong u Soso Tham khamtam kawei na ki poitri kaba ong ‘Baroh u briew ba stad mano ba lah ban len la khlem da plie ka lad mano ba lait ban kren’ halor kane u bah Kyrmen u la bynrap ba baroh ngi don la ka jong ka jong ka sap, hynrei lada ka lad kam plie kam poi shano shano ruh, ha kajuh ka por u la ai burom ïa ki riew rangbah ka jaitbynriew kiba dei na ka KAS kiba la trei shitom ha kaba pynneh pynsah ïa ka ktien khasi bad ong ruh “Ngam duh jingkyrmen ba ka ktien khasi kan sa rung ha ka thup jong ka 8th schedule”
U President jong ka Khasi Authors Society, u Prof D.R.L.Nonglait, pynsgew ba ïa kane ka Khasi Authors Sociwty la seng naduh ka 11 tarik u nailur 1979 bad ki kyntien ba ong “pyn ïair ïa ka ktien khasi’ ki dei ki kyntien phira, ka Society ka don ki tnat treikam lane ki Unit bapher bapher, ha Khliehriat, ha Jowai, ha Sohra, Mairang, Nongstion, Nongpoh, Mawkyrwat,
U la ong ruh ba ka Society mynta ka dang pynkhreh ban pynmih ïa ka Khasi-Khasi Dictionary, yn sa sdang noh shen ruh ban pynkylla khasi ïa ki 200 tylli ki supreme court judgement, u la pynshai ruh ïa ki kam jong ka Khasi Authors Society kiba ka Society ka la la dep ruh ban dawa na ka sorkar ban pynlong noh ïa ka ktien khasi kum ka official language ha kaba myn ha u bnai risaw ka seng ka la dep ban buh ïa ka dorkhas ha khat u myntri rangbah ka jylla.
U la ong ruh ba ka thoh ka tar ka la nang ïaid bad ka kolshor ka la nang skhem bad ieng rangbah “Ka seng ka ju pynlong lai tylli ki prokram ba kongsan man la u snem, kata ha ka 11 tarik u nailur, kum ka sngi ka thoh ka tar, ka sngi u Thomas Jones bad kane ka sngi iap u Soso Tham”
Kiba la ai jingkren ki kynthup ruh u Principal jong ka Jaiñtia Eastern College Khliehriat, u Dr Phervsion Nongtdu bad u Fr I.Warpakma, ïa ka prokram la pyniaid da u Vice Prisident ka shnat KAS Khliehriat, u bah E.S.Shangpliang.
