Nongpoh, Nohprah 18: Ka Khasi Students Union North Khasi Hills District Unit ha ka sngi Saitjaiñ ka la nang ioh bor ha kam ban shakri paidbah da kab ka la lah ban pynkha sa ïa kawei ka shnat treikam ba la ti[ kum ka KSU Umder Circle kaba don haduh 12 tylli ki Unit treikam hapoh kane ka Circle.
Ïa kitei ki nongïalam katei ka Circle kab la pynkha nyngkong eh kum kata ka Circle ha ka thaiñ Umden ha Ri Bhoi la wan ban pyntian smai da u Samla Rangbah Raymond Kharjana, Organising Secretary ka KSU Seng Kmie, ha ryngkat u Samla Rangbah Ferdinald Kharkamni President KSU NKHD Unit, U Samla Rangbah James Hitler Mawphniang u ba dei u Legal Affair Secretary ka KSU Sengkmie ha kajuh ka por u ba bat ruh kum u General Secretary ka KSU NKHD Unit, ki Nongïalam ka KSU NKHD Unit bad KSU Nongpoh Circle nalor kiwei pat.
La pynlong ïa kane ka Lympung pynskhem ne pyntian smai ïa ki Nongkitkam ba Nyngkong jong ka Seng ha ka Hall ka St Joseph Higher Secondary School Umden .
Haba ai jingkren ha kane ka lympung u Samla Rangbah Raymond Kharjana uba la shim ruh ïa ka bynta ban pyntian smai ïa ki Nongïalam ba Nyngkong ka Circle da kaba u la kyrtiang dien khyndiat halor ka jingïaid lynti jong ka Seng naduh ba Seng ïa ka haduh mynta mynne bad ong ruh ba ka jinglah jong ka Seng KSU ban ai ka jingshakri sha ki paid ka bri u Hynniewtrep dei namar ka jingskhem jingmut bad ka Nongrim ba skhem bad ba Rangbah jong ki Nongïalam kiba dang don bad kiba la leit noh.
“Dei ma ki, kiba la saindur bad la pynlong ïa ka Seng ba Kan ieng rasong kumne kumba long mynta bad dei lyngba ka KSU la mih shibun ki Nongïalam ba stad bad ki riew shemphang hapoh ka Ri Khasi bad Jaintia.” ong u Samla Rangbah Raymond Kharjana.
“Ha ki snem kiba kham mynshwa kum ka Jaitbynriew ngi la mad ka jingshah ibein ha ki briew kiba wan wir wan hap na kiwei ki Jylla la ka long ha ki kam ki jam ne ha ka pule ka dangle, hynrei ka KSU ka la mih sha khmat ban ïada ïa ka jong ka Jaitbynriew lyngba ka jingïalam jong ka Seng bad u wei na kita u dei u Bah Bull Nongjop Lyngdoh ban kwai ha dwar U Blei u ba ïalam ïa ka Kynhun ban rat naphang lut ïa ki Mynder ha kato ka por la ka long ha sor ne ha khap sor, bad kane ka jingshlur jong u Bah Bull Nongjop Lyngdoh ka la wanrah ka jinglong shngaiñ ha ka mynta ka jong ngi.” bynrap u Samla Rangbah Raymond Kharjana.
U Samla Rangbah Raymond u la kyntu ruh ïa ki Nongïalam ba Nyngkong jong kane ka Circle kaba thymmai ban don ka mynsiem ban aiti lut na ka bynta ka Jaitbynriew bad ban don ruh ka mynsiem sngewrit. “Wat ai ba ka jingdon jong phi hapoh ka KSU kan pynlong ïa phi ban leh ba heh ne sarong, hynrei ïaid da ka jingsngewrit, long ruh kiba lah kloi ban ïa treilang bad ki Nongïalam Shnong ne ki Seng Longkmie ne Seng Samla hapoh ka imlang ka sahlang ban wanrah ïa ka roi ka par bad ka bha ka miat, u la bynrap. La pynwai ïa ka tei ka lympung da kaba jingpyrta ïa ka kyntien Phira jong ka Seng, “MAITSHAPHRANG KHLUR KA RI”.
