SHILLONG, Lber 23: Ka sngi ba hynñiew (Day-7) bad ka jingïalehkai kaba 13 jong ka Inter Office Cum Corporate League T20 Cricket Tournament 2025, ba la pynlong da ka East Khasi Hills Cricket Association [EKHCA], ha Sohra, ha ka sngi Saitjaiñ jong ka taïew ba ladep, ka la jam sha kaba kut ha kaba ka MLP Sohra ka la pynliem da 22 ron ïa ka NIT Meghalaya ban khur ïa ka jingjop.
Hadien ba jop ïa ka jingkynting pisa (toss) ka MLP Sohra ka la rai ban tied nyngkong bad ka la lah ban kamai 194 ron haduh kaba kut jong ka 20 ober bad khyllem tang 3 wiket. U Ricky Nhadia u la long uba kongsan tam ha ka tied da kaba kamai 85 ron naki 53 bol. Katba na ka liang jong u Hriday M Kalita u la khur 1/34 naki 4 ober.
Haba pyrshang beh ïa ka thong ka NIT Meghalaya kam shym la kynjoh satia ïa kaei kaba ka donkam, watla u Vickyson Lambert War u la kyrshan da kaba kamai 49 ron naki 49 bol hynrei ka kynhun ka la ïohlad ban kynjoh tang 172/7 haki 20 ober, kaba la pynlong ïa ka ban shah rem noh da 22 ron.
U Phelps Kharjana u la tyngshaiñ ha ka bol da kaba khur haduh 5/27 naki 4 ober kaba la pynïoh ïa u ban khur ïa ka khusnam ‘Player of the Match’. Ha kane ka sngi la thmu ban pyndep ar tylli ki jingïalehkai, hynrei ka jingïakhun hapdeng ka Ribhoi Office Combine pyrshah ïa ka Combine SHG la shah pynthut noh.
