Mawkyrwat, Lber 23: Ka Seven Sisters’ Secondary School ryngkat ka Upper bad Lower Primary School, Mawmitbah, South West Khasi Hills District ka la ïoh ban pynhap pyrda noh ïa ka lympung ïalehkai sport kaba la tip kum ka Annual School Sports Meet 2025 ha kaba ka Red House ka la long ka lahduh ha ka lympung ïalehkai ba la pynlong ha madan Mawthengbah, Mawsaw, South West Khasi Hills District.
Ha kane ka sngi ban pynhap pyrda u bah Forwardman Nongrem u la long kum u kongsan bad u bah Rutherford Lyngdoh kum u symbud kongsan ha ryngkat ka jingdonlang ki khynnah skul, ki kmie jong ki khynnah bad ki nonghikai ba kynthup naduh ka Headmistress jong ka Seven Sisters Secondary School, Mawmitbah, ka kong R.L. Sangriang bad u Secretary ka Managing Committee, u bah Kimland K. Lyngiong.
Ban pynkut ïa kane ka lympung ïalehkai, la ïoh ban sam ïa ki khusnam nongjop sha baroh kiba la poi sha ka thong kata ka kynhun kaba lahduh ne Champion dei ka Red House, Best March Past dei ka Blue House, Best Senior Boys dei u Kevin Lyngdoh Sangriang u ïoh haduh saw tylli ki takma ksiar, Best Senior Girls dei ka Aishalin Sangriang kaba ïoh saw tylli ki takma ksiar.
Nangta, u Iaiwadborlang Lyngkhoi u ïoh Best Junior boy da kaba khur haduh 4 tylli ki takma ksiar bad ka Banisha Iawphniaw kum ka Best Junior Girl kaba la ïoh 3 tylli ki takma ksiar.
Ym tang kata, na ka liang ka Seven Sisters Secondary School ryngkat ka Upper bad Lower Primary School, Mawmitbah ha kane ka sngi ka la ïoh ruh ban pynkup burom kyrpang na ka bynta u samla u Kevin Lyngdoh Sangriang uba don mynta ha ka lynti ban leit sha ka 21st National Mountain Bike Championship ka ban sa sdang naduh 28 – 31 tarik u Lber, 2025 Panchkula Haryana.
