SHILLONG, ïaïong 16: Ka Meghalaya Pencak Silat Association (MPSA), ha ka 16 tarik u ïaiong 2026 jong ka sngi Palei, ki la leit ban ïakynduh ïa u Myntri ba dei peit ïa tnad Sports and youth Affair u bah Wailadmiki Shylla ban pynsngew ïa ka jingangnud jong ki nongïalehkai ban ïoh ïa shim bynta ha ka National Games kaban long ha u snem 2027 ha Meghalaya.
Kane ka jingleit ïakynduh la ïalam da u Bah Dipshon Ryntathiang kum u President bad la synran lang bad ki khynnah ïalehkai kiba la khur takma ha ka Senior National Khelo India ASMITA Pencak Silat League 2025-2026, ha kaba ka kynhun ïalehkai jong ka jylla Meghalaya ka la ïohrah ïa ka nam lahduh lane Over All Champion.
Ha katei ka lympung kaba ar sngi kaba la pynlong ha Sports Authority of India (SAI) centre ha NEHU ka jylla ka la ïoh ban khur 2 tylli ki takma ksiar, kawei ka rupa bad kawei ka rnong ha baroh ar ki kyrdan ïakhun combat (tanding) bad artistic (seni).
Haba ai jingkren sha ki lad pathai khubor u President ka Meghalaya Pencak Silat Association, bah Dipshon Ryntathiang, u la ïathuh ba kane ka jingïakynduh ka long ban ai khublei ïa ka jingdon ryngkat jong u Myntri ka tnad Sports ha ka sngi plie pyrda ïa ka lympung bad kumjuh ruh kum ka dak ban ai mynsiem ïa ki samla ba kin dang lehkai bha shuh shuh nangne sha khmat.
Nalor kane u la ong ruh ba ka Association ka don jingthmu ban pynlong ïa ka ka Senior National Championship ha u bnai Naitung bad kumjuh ruh ban pynlong ïa ka sienjam kaba lai jong ka State Championship khnang ban ïoh jied ïa ki samla ïalehkai na baroh 12 tylli ki District ki ban ïa shim bynta ha ka National Championship, ha kaba na ka liang jong u Myntri ka tnad Sports u la kular ban kyrshan ïa ka State Championship.
Ha kaba ïadei bad ka 39th National Games 2027, u bah Dipshon u la pynsngew ba ka synjuk ka la pyrshang ban phah ïa ki shithi namar ka shong ha ka jingpynïaid jong ka Indian Olympic Association bad Meghalaya State Olympic Association bad kumjuh ruh ka Sorkar.
U la pynkut da kaba ong “Na ka liang jong ki khynnah ki angnud ban ïoh ïashim bynta ha ka National Games 2027 bad ka kynhun ka khmihlynti ban khur ym duna ïa 14 tylli ki takma”.
