Shillong, ïaïong 16: Ka Nangkiew Irat SC, ka la sdang ïa ka jingïakhun ka jong ka ha ka lympung 5th Meghalaya State League ba la pynïaid da ka Meghalaya Football Association, da ka jingjop kaba khraw haduh 9-0 kol pyrshah ïa ka Mulang SC Nongbah, ha ka Group-B kaba la long hynne ka nohphai sngi ha madan MFA Turf, Third Ground, Polo.
Ka Nangkiew Irat ka la lamkhmat lypa da 3-0 kol ha ka kylla step bad ka la bynrap biang sa 6 tylli ki kol ha ka kylla miet, ha kaba ka Mulang Nongbah ka la shem shitom ban khanglad ïa ki hadien ba u wei na ki rangïalehkai jong ka, u Dawanlangki Susngi, u la shah beh noh hadien ba ïohpdiang ar tylli ki yellow card. Ka Nangkiew Irat ka la pynkhihjar lyngba u Sangti Janai Shianglong (12′, 56′), Banshanlang Nongdhar (21′, 85′), Brolington Warlarpih (26′), Dibinroy Nongspung (57′, 88′) bad u Restom Khriam (90′).
Ka Mawlai SC kaba bat ïa ka nam lahduh, ka la jop da 3-1 pyrshah ïa ka Amlarem SC ha ka Group C, katba ka Maram FC ka la pynliem noh da 3-2 ïa ka A’chik SCO Rongjeng ha ka Group G. Ïa kine ki jingïalehkai la pynlong ha Amlarem bad ha Williamnagar, ar tylli ki madan thymmai na ka bynta ka MSL mynta u snem.
Katba ka Rangdajied United FC, lahduh jong u snem 2023, ka la don hapdeng ka jingsyier, ha kaba ka la hap ban wanphai na ka shi kol ban jop da 2-1 kol ïa ka Mawten SC ha Mawkyrwat.
Kane ka jingïakhun jong ka Group H la sakhi ïa ka Mawten SC kaba la ïoh ban lamkhmat lyngba ka kol jong u Wellberjune Lyngdoh (45′) bad dei tad ynda la jam sha ka minit kaba 69 ba ka Rangdajied ka la ïoh ban pynïakhaid lyngba u Firstborn Roy Khongsti. Nangta, satang 10 minit shuwa ban kut, u Freelyson Tariang (81′) u la pynkhih ïa ka jar kaba rai artad ïa ka jingjop na ka bynta ka RUFC.
Kumjuh ruh ha Shillong, ha ka Group A, ka Umkaber SCC ka la wanphai na ka shi kol ban pynliem ïa ka Mawshun SCC da 3-2 kol ha SSA Stadium.
Ka Mawshun ka la ïoh ban lamkhmat lyngba u Niki Khonglam (16′) hynrei u Pynshaibor Kharbteng (37′, 46′) u la pynïakhaid shuwa ban kut ka kylla step bad pynbud sa kawei ban buh hakhmat ïa ka Umkaber ha ka minit ba sdang jong ka kylla miet. U Bradley Masynting (72′) u la ïoh ban pynïakhaid shipor ïa ka Mawshun shuwa ba ka Umkaber kan pynskhem ïa ka jingjop da kaba pynkhihjar ha ka minit pynjlan ba khatduh lyngba u Toberwel Marngar (90’+1).
Ha ka Group E kaba la long ha Wahiajer, ka Shillong Lajong FC, lahduh jong u snem 2019, ka la lah ba kan khur ïa ka jingjop da 3-0 pyrshah ïa ka Lumphyrnai Sohphoh FC.
Hadien ka jingïalehkai kaba khlem kol ha ka kylla step ka SLFC ka la ïoh ban pynkhihjar lai sien ha ka kylla miet lyngba u Samchaphrang Lato (51′), Riborlang L Lyngkhoi (57′) bad u Banlamkupar Rynjah (81′) ban khur ïa ka jingjop.
Khatduh ha Khliehriat, ka Group D ka la sakhi ïa ka jingïakhun hapdeng ar tylli ki kynhun ba pawkhmat na Jaiñtia Hills, ha kaba ka Thangskai Tiger SC ka la pynliem ïa ka Ladthadlaboh SC da tang 1-0 kol kaba la thep ha ka minit kaba 68 da u kapten ka Tigers u Phermedaki Syrti.
Ka prokram ïalehkai ha kane ka sngi Thohdieng (Baroh kin sdang ha ka por 3 baje nohphai sngi):
Group A (Shillong SSA Stadium) – Ym don jingïakhun
Group B (Shillong MFA Ground) – Mawlum Tyrsad SCC pyrshah ïa ka Mawphu SC
Group C (Amlarem) – Laskein SCSC pyrshah ïa ka Lamin XI SCC
Group D (Khliehriat) – Jalaphet Pyrdung SC pyrshah ïa ka Rymbai Shkenshynriah SC
Group E (Wahiajer) – Iatyllilang Lumsehkot CSC pyrshah ïa ka Lamyrsiang SCC
Group F (Mairang) – Langsning FC pyrshah ïa ka Mishon SSCC
Group G (Williamnagar) – Janepih YSCA pyrshah ïa ka Attong Matgrik FC
Group H (Mawkyrwat) – Mawlarshong SC pyrshah ïa ka SS Umdang Pyllun