Katba nangmih ki sngi, ki lynti ïaid kjat khamtam na Motphran, GS Road ter ter shaneng ki la nang khap ngiah haduh ba ka la buh jingeh ïa ki nongïaid lynti ban ïaid khamtam eh ha ka por ba jur ka dheng kali. Hynrei kane ym lah ban lait ha kano kano ka jaka ba long ïew kampher la ka dei ha nongkyndong lane ha sor hynrei kam dei pat ban long shaba palat pud haduh ba kan da ktah ïa ka leit ka wan jong kiba bun balang bad ktah ruh ïa ka jingïaid beit jongki kali ha ki surok bah.
Lada kren hi ïa ka jingshisha ki bor ba dei peit kam pher la ki dei mano mano ruh ki dei ban pyntikna ba ki lynti ïaid jong ki paidbah bad kumjuh ki lynti ba dei ban ïaid ki kali kim dei ban shah ktah namar kane kan buh pat ka jingma ïa ka jingim jong ki briew lada ki hap ban ïaid noh na surok kali. Ha kawei ka liang sngew dei ban ai ka jingïaroh ïa ka sorkar jylla kaba la nud ban shim ïaka rai rangbah ban ym shah shuh ban ai ïaid kali lane ban die dukan ha sh lynter ka Khyndailad kaban mih sha Lad Umsohsun haduh ba ka la ïoh ïa ka jingïaroh kum kawei na ki jaka kaba pyngad ban ïaid kai, ban thied ban pet ha ka rukom kaba shngain bad ruh ba kin ïoh ïa ka lad ban shondur ban buh jingkynmaw na ka bynta kito kiba wan na kiwei ki jylla ne na kiwei ki ri.
Kaba sah mynta ka long ïa ki bor ba dei peit ba kin tuklar noh pat ïa ki bynta jong ka Motphran ter ter shaduh Ïewduh kaba la donkam kyrkieh bha ban wallam ïa ka jingkhuid bad ka jingkylluid kiba dei ki bynta kiba kongsan bha ban wanrah ïa kata ka jingitynnad jong ka. Ka dei ka jingmlien jong ki briew ha shwa ba kin leit sha kano kano ka jylla ba kin wad bniah shwa na google lane na ki lad pathai khubor shaphang kato ka jaka bad ki da leit khnang ruh ban leit peit lane ban leit kai. Kumjuh kane ruh ka long ïa ki briew kiba wan na shabar kiba kwah dik dik ban wan peit ïa ka Ïewduh kaba tip kum ka ïew kaba rim tam ha ka thain bad kumjuh ïa ka Khyndailad kaba dei kum ka jaka ïew kaba heh tam ban thied ïa ki riam ki beit bad kiwei kiwei. Kumta lada jia ba kine ki jaka ba pawnam kim long kumba ki paidbah ki khmih lynti ka jingjah burom kan dei ïa ka jylla khamtam lei lei lada kim long kiba khuid bad kiba kylluid.
Lada kren beit kumba ka long, ka ïewduh ka dei kawei ja ki jaka kaba khapngiah tam bad ka daw kam dei ei namar ba la bun ki briew nongleit siew, hynrei ka daw kaba kongsan ka dei namar ba ki bor kiba peit bad synshar ïa ka Ïewduh kim lah ban teh kyndon ba ki dukan kim dei ban kyntu pud sha lynti ïaid paidbah. Ha kine ki sngi ka la long kaba thait bha ban rung shapoh jong ka ïewduh namar ba la pynwit palat ïa ki lynti ïaid ad ka ïew ka la shu khap ngiah bad kam long shuh ka ïew kaba khuid kaba suba. Ki paidbah ki ju ud bha ban kiew sha Motphran bad Ïewduh ha ka sngi Saitjaiñ namar ba jur palat ka jingkhapngiah na ka jingïaphngian shaba palat ka jingbunbriew kiba wan siew ban tda.
Halor kane, la donkam ïa ki bor ba dei peit ba kin tuklar ban peit ba ka Ïew ka dei ban long kaba khuid bad khamtam eh ban pyllait ïa ki jaka ïaid paidbah namar lada shu ailad tang ban shu pyndap lut ïa ki jaka ba lait kan poi ka por ba ki paidbah kin ym kwah shuh ban kiew thied jingthied sha ïew.
