Dei u pyrsa kurim barim ba thombor ïa u kthaw bad kiaw ha Mawrok Porsohsat

Nongstoiñ, Nailar 02: Ki Pulit ka Nongstoiñ West Khasi Hills District, ki la pyntip ba ki la ïohkem noh ïa u runar u ba thombor ïa ka ïing ka sem jong u Bah Elbin Kharbani bad ka kong Seldaris Kharsyntiew, kaba la jia ha ka step synñia jong ka 31 tarik ha ka shnong Mawrok Porsohsat, kaba lam ruh sha ka jingkhlad noh u Bah Elbin na ka jingmynsaw.
U Superintendent of Police ka West Khasi Hills Bah H.P Kharkongor u ïathuh ba une u briew ba leh ïa kane ka kam, u kyrteng u Koldongstar Thongni ba 22 snem ka karta. U la ong ba la ïoh kem ïa une u runar na Ïew Nongstoiñ ha ka miet 31 tarik Naitung, hadien ka jingkhynra kaba jur da ki pulit ka Nongstoiñ ryngkat ka jingïarap jong ki dkhot ka VPDCNA.
U SP u ïathuh ba ha ka jingtohkit, u Koldingstar Thongni u la phla ba u la ot shwa ïa ka bording elektrik ha katei ka ïing shwa ban rung jubor, nangta u la rung jubor shapoh ïing bad thombor ïa kitei ki ar ngut shi kurim kiba dei ki kthaw bad kiaw barim jong u, ha ka por ba ki dang thiah.
Na ka liang u SP u la ïathuh ba hadien katei ka jingthombor, utei u briew u la ïalam ïa ka khun khatduh jong kitei ki ar ngut sha kawei ka khlaw kaba don ha ka shnong Sylleiïawkheiñ kaba don marjan bad ka shnong Mawrok Porsohsat.
Hynrei, ha ka por kumba 3 baje janmiet jong ka 31 tarik u Naitung katei ka samla ba 18 snem ka karta ka la ïoh ban phet, katba u Koldingstar u dang thiah lyngngai ha katei ka khlaw bad ka la poi suk sha la ïing bad mynta ka dang don ha Civil Hospital Nongstoiñ na ka bynta ki jingsumar.
U Superintendent of Police Bah Kharkongkor, u la pynpaw ba ha ka jingtohkit la lap ba u Koldingstar Thongni u dei u kurim ba la ïashong khlad bad ka samla kaba dang 18 snem ka karta kaba dei ka khun khatduh jong ki shi kurim.
La ïathuh ruh ba ka daw jong katei ka jingthombor ka dei namar ba u Koldingstar Thongni u dom ïa la ki kiaw ki kthaw, ba kim shym la shah ïa u ba un ïashong ïa sah ryngkatlang bad ka khun khatduh jong ki.
U SP u la ong ba ki pulit ki la ïoh kurup ïa ka tiar ba la suba pyndonkam ha katei ka kam thombor, ryngkat ruh bad kiwei kiwei ki sakhi sabut kiba kdew ba u Koldingstar Thongni u dei u ba la suba donkti ha katei ka kam runar.
Na ka liang jong ki pulit ki la dep ban register case pyrshah ïa u Koldingstar hapoh ki kyndon 103, 109, 118 bad 140 jong ka Bharatiya Nyaya Sanhita (BNS) bad ka jingtohkit kaba bniah ka dang ïaid shakhmat.