Pynkhliañ ka NCB bad ki pulit ka Meghalaya ban pynpra pyrshah ïa ka network khaïi drok

Shillong, Nailar 2: Da ka jingkiew sted ka jingkhaïi drok ka la mih kum ka jingeh kaba nang jur ha ka thain shatei lammihngi, ka Narcotics Control Bureau (NCB) bad ki Pulit ka Meghalaya ki la pynjur ïa ka jingpyrshang ban pynpra ïa ki network khaïi drok lyngba ka jingiatreilang kaba jan bad ka jingiasamlang ïa ki jingtip.
Kane ka sienjam ka la wan ha ka jingïalang kaba ar jong ka Joint Coordination Committee (JCC), kaba la pynïaid da u Deputy Director General ka NCB (North Eastern Region) u R. Sudhakar, ha ophis jong ka Meghalaya Police Headquarters dang shen ha nongbah Shillong.
Kane ka jingialang kaba ha khlieh duh ka la wanrah lang ïa ki ophisar ba rangbah jong ka Meghalaya Anti-Narcotics Task Force (ANTF), ki Pulit ka Meghalaya bad ki nongmihkhmat na ki tnad pyntreikam ba kongsan jong ka pdeng bad ki tnad wad bniah, kynthup ïa ki Customs, CGST, Income Tax, Subsidiary Intelligence Bureau (SIB), Special Branch (SB), National Investigation Agency (NIA), Enforcement Directorate (ED), Directorate of Revenue Intelligence (DRI), ka Drug Controller’s office, Assam Rifles, BSF bad CRPF. Ha kane ka sngi la wan ban ïa shim bynta ruh da ki Superintendent of Police na kylleng ki district jong ka jylla Meghalaya.
Ki heh ophisar ki la bishar bniah ïa ka jingkylla jong ka jinglong jingman jong ka jingkhaïi drok ha ka jylla, da kaba ithuh ïa ki jinglong jingman kiba dang mih ha ka jingkhaïi drok, ki mukotduma ba kongsan jong ka NDPS bad ka jingpyndonkam bakla kaba nang kiew ïa ka India Post, ki courier services bad ka air cargo networks na ka bynta ban pynpoi ïa u drok.
Ka jingialang ka la pynleit jingmut ban pynkhlain ïa ka jingsam jingtip ha ka por ba shisha, ki jingtohkit ba iatreilang, ki jingtohkit halor ka pisa ïa ki kynhun khaïi drok, ka jingbuddien ïa ki case ba kongsan jong ka NDPS bad ka jingpyndonkam kham bun ïa ki tiar tohkit ba la pyndonkam kaykum ka teknoloji ban thmu beit ïa ki kynhun khaïi drok.
Ki tnad kiba ïashim bynta ki la rai ban pynjur ïa ki kam ba la pynlong da ka jingstad bad ban pynbha ïa ka jingiatreilang hapdeng ki tnad ban pynthut ïa ka jinglong jingman jong ka jingkhaïi drok baroh kawei kaba treikam hapoh bad lyngba ka Meghalaya.
Kane ka jingïalang ka wan hapdeng ka jingpyrshang ba dang ïai bteng jong ki sorkar pdeng bad ki tnad jong ka sorkar jylla ban tehlakam ïa ka jingkhaïi drok shabar pud ha ka thaiñ shatei lammihngi, ka thaiñ kaba ïasam ïa ki pud ki sam kiba jngai bad ka la nang kham long ka jaka ba kongsan jong ki kam khynra pyrshah drok.