Dei ban pynduh ïa ka jingkhot Personal Interview ha ka Grade III & IV: Lakhon Biam

Jowai, Rymphang 06: U ma Lakhon Biam haba kren sha ki lad pathai khubor ha ka sngi wan thep kyrteng jong u ha DC ophis Jowai ula pynpaw ba la donkam ban pynduh pyndam noh ïa ka Personal Interview na ka bynta ki Grade III bad Grade IV ha ka rukom thung kam thung jam hapoh ka jylla. Shuh shuh u ma Lakhon u don ka thong ban pynshna thymmai noh ïa ka rukom thung kam thung jam lyngba ki DSC, MPSC, namar kumba long mynta hadien ka jingkhot Advertisement kala shim por kumba 4 ne 5 snem ban khot Interview bad la dei ban khot Advertisement bad Interview manla ka snem.
Ha kaba ïadei bad ba kane ula ong ba kane ka dei ka sien ba ar ban ïakhun biang ïa ka Election MLA hadien u snem 2018 uba la wan ha ka kyrdan ba ar, hynrei ka vote kaba ula ïoh kumba 8 hajar tam u kyrmen ba kan nang kiew ar shah ha kane ka kynti 2023.
Kum u kyrtong ula ong ‘La 90 percent nga la dep ban rung sha manla ki thiew ïing bad kaba kmen eh ka long ba ka jubab kaba ngan ïoh ka long ba ha kane ka kynti 2023 ka jingjop kan wan beit sha nga napoh ka 3-Raliang Constituency’.
Ula ong ba ka 3-Raliang Constituency ka dang duna bha ha ki kam pynroi kum ki lynti syngkiengbad kiba bun ki shnong kim pat ïoh surok haduh mynta, ka koit ka khiah kiba bun ki PHC la dei ban kyntiew kyrdan hynrei kila neh sah kumjuh.
Lada phai sha jingnang jingstad ki dang duna shibun ki skul ba bha, u kyrmen ynda un wan ha ka jingjop ïa ka Engineering College la dei ban shna noh katkum ka proposal kaba dei ban buh ha Thadmuthlong bad ïa kane ula thrang shisha ban wanrah hapoh ka 3-Raliang Constituency, la ong ma Lakhon.