Bteng ki 10 ngut ki kyrtong na ki party bapher bapher ban thep kyrteng ha Ri Bhoi

0

Nongpoh, Rymphang 06: Katba ki sngi ki la dang jan ban poi noh sha ka sngi ban pynthymmai ïa kita ki nongmihkhmat sha ka ïing Dorbar Thaw aiñ ka jylla, ki kyrtong na ki party bapher bapher ki la dang bteng ban thep kyrteng na ka bynta ban pynthikna kum kita ki kyrtong kiba ki thmu ban aireng ha kane ka election 2023 hapoh ka jylla.
Sa tang shi sngi ba ka election commission ka ri India ka la ai por ban thep kyteng ïa ki kyrtong hapoh ka jylla ka ban sa kut noh ha ka 7 tarik u Rymphang 2023 bad na ka Ri Bhoi District ki kyrtong kiba la lah ban pyndep na ka bynta ban thep kyrtong mynta ka sngi ki la poi kumba 10 ngut ba kynthup ki kyrtong na ki party bapher bapher.
Kitei ki kyrtong ba la pyndep ban thep kyrteng mynta ka sngi ki kynthup ïa ki saw ngut ki kyrtong na ka party UDP ba kynthup ïa u Bah Mayral Born Syiem, MLA ka Nongpoh bad kyrtong ka UDP na Nongpoh, u Bah Baïahunlang Makdoh, kyrtong ka UDP na Mawhati, u Bah Badhok Nongmalieh, kyrtong ka UDP na Jirang bad u Bah Sunshine Makri, kyrtong ka UDP na Umsning Constituency.
Ki 3 ngut ki kyrtong ka BJP ba kynthup ïa u Bah Shanbor Ramde na Umroi, u Bah Duruth Majaw na Umsning bad u Dr. Evarist Myrsing na Mawhati ki la lah ban pyndep ha kaba thep kyrteng mynta ka sngi kum kita ki kyrong ba pura ka BJP ban ïa khun na kitei ki constituency.
Kiwei pat ki kyrtong ba la pyndep ban thep kyrteng ki kynthup ïa ka Kong Evalyne Kharbani, kyrtong ka HSPDP na Mawhati, u Samla Baïateilang Lapang, kyrtong ka PDF na Umroi bad uwei u kyrtong shimet u Bah Osbeth B Rynjah uban ïa khun na Mawhati Constituency.
Baroh kitei ki 10 ngut ki kyrtong mynta ka sngi ki la shim ïa ka jingsmai ban long kita ki kyrtong ki ban ïa khun ha kane ka election 2023 na ki constituency kiba don ha Ri Bhoi hapoh ka jylla Meghalaya.

Leave A Reply

Your email address will not be published.