Shillong, Naitung 11: Ki kynhun Seng bapher bapher ka Ri-lum Garo kila dawa ba dei ban khangdam noh ïa ka New Life Foundation Rehab Centre ha Goalpara hadien ka jingshah pynïap jong u Niksamseng Ch Marak, u samla Garo na Tura, West Garo Hills myn ha ka 4 tarik Naitung ha kaba kane ka jingjia ka la wanrah ka jingpynrem kaba jur bha sha ka thaiñ Garo Hills.
Ki sengbhalang kiba dawa ban khangdam noh ki kynthup ïa ka Garo Students’ Union (GSU), Goalpara Unit, Garo Jatiya Parishad (GJP), Garo National Union, bad GNC kila ïasnohkti lang ban dawa khang noh ïa kane ka rehabilitation centre.
Ha ka shithi ba la ïasoi lang kaba la phah sha u Deputy Commissioner ka Goalpara District, kine ki kynhun ki la dawa ruh ba kane ka Rehab Centre ka dei ban siew ïa ka bailutksan ïa ki bahaïing hasem jong une u samla.
“Une u samla ula ieh shadien ïa i khun ba dang 4 snem bad ka kurim bad u dei u nongkamai jakpoh jong ka Ïing. Kumta, ngi kyrpad ban phah siew bai lutksan sha ki bahaïing hasem jong u,” ong ka shithi ba la phah sha u DC da kitei ki sengbhalang.
Lah ban kdew ba haduh 8 ngut ki briew ki la shah kem ha ki Pulit ka Assam halor ka jingsuba donkti ban pynïap ïa u Niksamseng. Hynrei, u trai ka New Life De-Addiction Centre Rakibul Hussain lem bad uwei u nongpang, ki dang phet rieh haduh mynta.
U Niksamseng ula shah pynïap tohmet bha ha ki briew ba la kynnoh ba ki dei kiba don ha kane ka Rehab Centre myn ha ka 4 tarik Naitung. Ula shah set ha kane ka centre naduh ka 2 tarik Naitung hadien ka jingkem ki Pulit ka Assam.
Ha ka sngi ba-ar, u Myntri Rangbah ka Jylla Conrad K Sangma ula phah tuklar ha u Myntri Rangbah ka Assam Himanta Biswa Sarma ba un thung ïa ka jingtohkit ka bym shah liang halor kane ka jingkynnoh pynïap ïa une u samla Garo.
