Ban kyntiew ïa ki ktien bad ka sap ki samla, pynlait ka sorkar jylla ïa ka OTT platform

Shillong, Naitung 11: Kum ka jingthmu ban kyntiew ïa ka ktien, ka sorkar jylla ka la pynlait ïa la ka jong ka OTT platform Hello Meghalaya ha ka sngi palei ha LARITI International Center for Performing Arts and Culture.
Ka Meghalaya ka la long ka jylla kaba nyngkong ban pynlait ïa ka OTT platform ban kyntiew ïa ka sap ki samla. Ban ïarap ïa ki samla babun, ka sorkar Meghalaya ka la wanrah ïa ka Hello Meghalaya OTT platform kaba thmu ban pyndon bynta ïa ki ha ki kam kiba pynmih jingmyntoi bad ban kyntiew ïa ka ïoh ka kot jong ki.
Ka Hello Meghalaya Platform ka ai lad ïa ki kam kiba dei naduh ki Movie, Music Video, short film bad bun kiwei pat.
Na ka bynta ki nongshna phlim kane ka rynsan ka ai lad ban ïoh pisa haduh T.5 lak kawei ka phlim, da ka jingïarap pisa bynrap na ka bynta ki rynsan ha ka ri bad ha ki ri ka pyrthei haba ïadei bad ki phlim ba la kham paw. Ki Content creator ki ïoh T.18,000 manla ka bnai na ka bynta ka jinglah ban upload bun tam, la pyndon ruh ïa ki jingbei pisa kaba long ha nongrim ka jingdon kiba peit kaba ki don. Katba ïa ki Short video maker, short film maker kine ruh ki ïoh ïa ki lad jingmyntoi na kane ka rynsan.
Shuh shuh ka sorkar ka la pyrkhat ban buh ïa ki key live event ha ka app kum ki jingïalehkai football jong ki State league, music festival, ki MGMP event bad bun kiwei pat.
U Myntri Rangbah u Conrad K. Sangma u la ong ban pynbteng ïa ki jingpyrshang ban ithuh ïa ka ktien, ka jylla ka thmu ban leh ïa ka bynta ban pynneh pynsah bad kyntiew ïa ki ktien. U la ong, “Kane kan sa long ka jingwanrah jingkylla kaba donkam na ka bynta ki riew donsap bad ki lad ki bym ju ïoh mynshwa ïa ki nongshna phlim bad ki nongtem nongput jong ka jylla.”
U la kyntu ïa ki paidbah ka jylla ban ïasnohkti bad ka rynsan bad ban peit ïa ki jingpyni ban pynlah ïa ki ban ïoh ki jingsiew na ka bynta ki riew donsap.
Katba u Myntri ka tnat Tourism, u Bah Paul Lyngdoh haba kren halor ka MGMP u la ong ba 3000 ngut ki musician ki la kamai lyngba ka music. Da ka jingïatreilang bad ka Hard Rock Cafe mynta ka sngi yn ai ïa ka rynsan sha ki riew donsap ka Shillong ne Meghalaya ba kin shim bynta ha ka Hard Rock Cafes ha kylleng ka ri.
U la bynrap, “Ngi la long hakhlieh duh hadien ba ngi la pynlait ïa kane ka OTT Platform, da ka jingshaniah ba ki content creator bad awardee kin ai mynsiem ban shimkhia bha ïa kane ka kam.”
Katba u Chief Secretary u Bah D.P. Wahlang u la ong ba ka Meghalaya ka la kiew da ka jingdon bun ki kam bad ban pynthikna ba ka sorkar kan shim khia ruh ban pynmih bun ki kam. U la ong ba ka Hello Meghalaya ka dei tang ka digital platform hynrei ka jingrakhe ïa ka cultural heritage, da kaba ong ba kane ka dei ka jingsdang kaba nyngkong ha ka ri.
Ka la don ruh ka jingpyni ïa ka video teaser jong ka Hello Meghalaya kaba la pynbud pat sa da ka Meghalaya Content Creators Award 2024. Kiba jop ha ka Meghalaya Content Creators Award 2024 na ki 14 category ki long Jr Storyteller Lyndon, Green-Tech Foundation, Warimeki Lyngwa, Triyan Babilsi, Grace Marbaniang. Akkim Tito A. Momin, Chiiung, Dr. Kham Chyrmang, Pema Leilani Ward Kyndiah, Rachel Anne Nongkhlaw, Saldorik D. Sangma, Wanjop Sohkhlet, Yoomani Myria, Biria Shillong, Dapalei Stacy Warjri, Ferdinand Rani.