Shillong, Naitung 11: U MDC ka Laban – Mawprem, Bah Mitchel Wankhar ha ka sngi Baar jong ka Dorbar Lyiur ha KHADC u la wanrah da ka motion ban ïatai halor ka kamram jong ka Council ban ïada bad pynneh pynsah ïa ka mei mariang kaba hap ha u pud u sam jong ka.
Haba wanrah ïa kane ka mat, u Bah Mitchel u la ong ba ki don bun ki wah ba hap ha jingpeit jong ka Council la ka long naduh ka Umïam, Umjasai, Wah Rilang, Wah Kynshi bad kiwei kiwei kiba lada ym don ba shimkhia kan poi ka por ba ym tang ba kin ym ïoh shuh ïa ka umbam umdih hynrei kin shim jingeh wat ban ïoh ïa ka um ban sait ban khlieng ruh.
Kumta halor kane u kyntu jur ïa ka KHADC ba kan shimkhia ban tuklar lang.
Ha kajuh ka por u ong ba ki ju ïohi ba kylleng don jingtwa khyndew bad ki briew ki duhei ïa ka mynsiem. “Kane baroh kadei tang namar ngi lehbeiñ ïa ka mariang. Mynshwa ki riewtymmen ki ju ong thung dieng thung diengsoh mynta ban ïoh bam ki khun ki ksiew hynrei mynta pat long mar khongpong,” u la ong.
Da kaba pynpaw ïa ka jingsngewkhia halor ka jingnang syllen lut ki khlaw ki btap jong ka Council, u MDC u la kyntu ïa ka Council ba kan peit ba kan don ka jingthung dieng la kumno kumno saw sien ha ka shisnem khamtam ha ka por Lyiur bad ru ban don ïa ki jaka sara tynrai dieng ban sam ïa ki paidbah ba kin thung ha ki jaka jong ki.
Shuh shuh u kkyntu ruh ïa ka council ba kan trei lang bad ki khlieh nongsynshar na ka bynta ban pynneh pynsah ïa ki khlaw shnong khlaw shimet khamtam kito kiba don hajan ki tyllong umdih.
Kawei pat ka mat kaba u wanrah ka long ban ïakhun ïa ka jingbret pathar ïa ki jaboh jabain sha ki um ki kwah kaba la buh pat ïa ki dohum dohwah ha ka jingma ba kin duhjait.
“Nga kyntu ïa ka Council ba kin thung dieng ha Athiabari, Laitlad bad ha kiwei ki khlaw jong ka Council namar ngi don ki jaka da ki phew hectare kumta dei ruh ban thung dieng bad kynbat dawai,” u la ong.
Katba na ka liang u Nongïalam ka Liang Pyrshah, Bah Titos W Chyne pat u la pynkynmaw biang ïa ka jingmana pyndonkam plastik ha Iewduh.
Haba jubab halor kane ka Executive Member ka tnad Forest, Kong Macdalyn Sawkmie Mawlong ka la ong ba ka Council ka la pynkhlain bad aibor ïa ki shnong ban ïada bad pynneh pynsah ïa ki khlaw ki btap, ki khlaw kyntang bad ki khlaw ba don ki kynbat dawai.
“Ka Council ka la pynkhreh ruh ban thung dieng mynta ha ki jaka kiba don ha West Khasi Hills,” ka la ong.
Shuh shuh ka ong ruh ba ka Council ka pynkupbor ïa ki khlieh nongsynshar ban ïada ïa ki um ki wah bad ki lum ki kwah.
Nalor kine, ka la ïathuh ruh ba da ka jingïarap jong ka sorkar jylla ka Council ka la sdang ruh ïa ka jaka sara tynrai dieng ha Umtham bad ban sam pat sha ki paidbah.
