La mang T. 20 lak ïa ka Monolith Festival, la pynlut T 11. 22 lak, ong u EM Arts Culture

Shillong, Naitung 11: Ia ka Monolith Festival kaba la pynlong mynta u snem ka jingmang tyngka na ka bynta ban pynlut ïa katei ka Tamasa 2024 ka long T. 20 lak kaba dei kaba la ai sha ka Arts and Culture Conservation & Provision of Traditional Culture.
Ïa kane la jubab da u EM ka Arts and Culture ka KHADC u Bah Victor Rani ïa ka jingkylli ba la wanrah da u nongïalam Ïatei u Bah T W Chyne uba dei ruh u MDC ka Sohra konstituensi.
Haba ïathuh ïa ki jinglut u EM u la ong ba ka pisa T 7, 62, 000 lak la pynlut ha kaba ïadei bad ki kam ka Monolith Festival bad T. 3,60,000 lak la siew sha ki Volunteer kiba donkti ha ka festival baroh ka jinglut ka long T. 11,22,000 lak.
Shuh shuh haba kylli ba na katei ka T. 7 lak kiei kiwei pat ki jingpynlut, kaei ka Agency kaba pynïaid bad katno ka sorkar ka la bei pisa, u Bah Rani u la ïathuh ba ka Tnat Arts and Culture ka KHADC kam don jingtip ïa ka jingbei pisa ka sorkar ne ïa ka Agency kaba pynïaid hynrei kiwei ki jingpynlut ki long ka jingshim wai ïa ki bus 6 tylli kaba la pynlut T 48 hajar, ki Award T. 30 hajar, ba thied ïa ki paila 5 tylli ka long T. 5 hajar, ka Jaiñ Spong bad kiwei kaba long 5 tylli ka long T. 25 hajar, ka bam T. 60 hajar, ki miscellaneous T. 1.50 lak bad kiwei kiwei ha kaba kine baroh ka council ka la dep siew.